Posted: 02/21/2013 12:09 PM IST

టాటా కంపెనీ... ఈ కంపెనీ ప్రతివస్తువును సామాన్యులకు అతి తక్కువ ధరకు అందించాలన్నదే ముఖ్య ఉద్దేశ్యం. ఈ ఉద్దేశ్యంతో వివిధ రంగాల్లో టాటా తన హవాను కొనసాగిస్తుంది. ఇక స్వాతంత్ర్యం రాకముందే ప్రజలకు విమాన యోగాన్ని కల్పించిన వారిగా ఘనతకెక్కారు టాటాలు. జేఆర్‌డీ టాటా నేతృత్వంలో టాటా ఎయిర్‌లైన్స్‌గా మొదలై... తర్వాత ఎయిరిండియాగా పేరు మార్చుకున్న ఈ కంపెనీ... ప్రభుత్వ గూటికి చేరడంతో క్రమంగా టాటాలు విమానయాన రంగానికి దూర మయ్యారు. ఇప్పుడు దాదాపు ఆరు దశాబ్దాల తరువాత టాటాలు మళ్లీ విమాన రంగంలో అడుగుపెట్టబోతున్నారు. మలేసియాకు చెందిన చౌక ధరల విమానయాన దిగ్గజం ఎయిర్ ఏషియాతో . టాటా గ్రూప్‌ జత కట్టి భారత్ లో కొత్త ఎయిర్ లైన్స్ ని ఏర్పాటు చేయబోతున్నట్లు ఏయిర్ ఏషియా ప్రకటించింది. అన్ని అనుకున్నట్లు జరిగితే... టాటా-ఎయిర్ ఏషియా జేవీ తన విమానయాన కార్యకలాపాలను చెన్నై నుంచి నిర్వహించే ప్రణాళికల్లో ఉంది. ఎయిర్ ఏషియాకు 49 శాతం మెజారిటీ వాటా ఉండే ఈ ప్రతిపాదిత జేవీలో టాటా గ్రూప్‌నకు 30 శాతం, భాటియాకు చెందిన హిందుస్థాన్ ఏవియేషన్‌కు 21 శాతం చొప్పున వాటాలు ఉండేలా ఒప్పందం కుదిరినట్లు విశ్వసనీయ వర్గాలు పేర్కొన్నాయి. ఏదైతేనేం మళ్లీ టాటాలు విమానరంగంలోకి రాడంతో సంతోషకరమైన విషయమే.