Posted: 12/17/2012 07:13 PM IST

మాల్దీవుల ప్రభుత్వం మాలె ఎయిర్‌పోర్టు కాంట్రాక్టును రద్దు చేసిన నేపథ్యంలో తాము వారినుంచి 80 కోట్ల డాలర్ల(దాదాపు రూ.4,100 కోట్లు)కు పైగానే నష్టపరిహారాన్ని డిమాండ్ చేస్తామని జీఎంఆర్ పేర్కొంది. అయితే, అక్కడి ప్రభుత్వం మాత్రం తాము అంత చెల్లించాల్సిన అవసరం లేదని... జీఎంఆర్ ఖర్చు చేసిన వ్యయం, కాంట్రాక్టుకు సంబంధించిన లావాదేవీలపై ఫోరెన్సిక్ ఆడిట్‌ను జరిపిస్తామని కొత్త మెలిక పెట్టింది. జీఎంఆర్ అడుగుతున్నదానిలో సగానికంటే తక్కువే ఇవ్వాల్సిరావచ్చని తాము భావిస్తున్నట్లు చెబుతోంది. ‘నష్టపరిహారం మొత్తం 80 కోట్ల డాలర్లకు పైగానే ఉంటుందని సూచనప్రాయంగా చెబుతూ మాల్దీవుల ప్రభుత్వానికి మేం ఒక లేఖను పంపాం. ఇది మా ప్రాథమిక అంచనా మాత్రమే. కోల్పోనున్న లాభాలు, విభిన్న గణాంకాలు, ఇతరత్రా అంశాల ఆధారంగా తుది మొత్తాన్ని నిర్ణయిస్తాం’ అని జీఎంఆర్(ఎయిర్‌పోర్ట్స్) సీఎఫ్‌ఓ సిద్ధార్థ్ కపూర్ చెప్పారు.