తెదేపా అంతిమ జాబితా కోసం వైకాపా ఎదురుచూపులు

Posted: 04/14/2014 10:59 AM IST

ఇప్పటి వరకు మూడు విడతలుగా తెలుగు దేశం పార్టీ అభ్యర్థుల జాబితా విడుదలైంది.  84 స్థానాల్లో అభ్యర్థులను ప్రకటించగా ఇంకా 74 స్థానాలకు తెదేపా అభ్యర్థులను ప్రకటించటం మిగిలివుంది. 

చంద్రబాబు నివాసం దగ్గర టికెట్ లభించని నాయకుల మద్దతుదారుల నిరసనలు ఇంకా కొనసాగుతూనేవున్నాయి.  ఎన్నికల బరిలో దిగటానికి ఎదురు చూస్తున్న తెదేపా నాయకులే కాక ఇతర పార్టీలు కూడా అభ్యర్థుల జాబితా కోసం ఎదురుచూస్తున్నాయి.  అందులో తెదేపాకు ప్రధాన పోటీయైన వైయస్ఆర్ కాంగ్రెస్ కూడా ఎంతో ఆసక్తిగా ఎదురుచూస్తున్నట్లుగా ఉంది. 

వివిధ సామాజిక వర్గాలకు న్యాయం చేసే ప్రయత్నంలో ఎక్కడెక్కడ ఏ కులానికి చెందిన నాయకులకు ఇవ్వాలి, అందులో మహిళలకెన్ని సీట్లివ్వాలి అన్నదానిలో జరుగుతున్న కసరత్తు వలనే అభ్యర్థుల జాబితాను ఖరారు చెయ్యటంలో జాప్యం జరుగుతోంది. 

తెదేపా అభ్యర్థుల విషయంలో తేలేంత వరకు తమ అభ్యర్థులను ఖరారు చెయ్యగూడదనుకున్నట్లుగానే వైకాపా సీమాంధ్ర లో అభ్యర్థుల జాబితాను విడుదల చెయ్యటంలో ఆలస్యం జరుగుతోంది.  అదే తెలంగాణా విషయానికి వచ్చేసరికి వైకాపాకి అభ్యర్థుల నిర్ణయం చాలా సులభమైపోయింది. 

Related article

-శ్రీజ