సుఖంగా నిద్రపోవడానికి హెల్తీ టిప్స్..

Posted: 03/06/2015 05:45 PM IST

ప్రస్తుత ఫాస్ట్ జనరేషన్ లో ప్రతిఒక్కరు అటు ఇంటితోపాటు ఆఫీసు కార్యక్రమాలను నిర్వర్తించుకోవడంలో బిజీగా వుండటం వల్ల ప్రశాంతంగా నిద్రపోలేకపోతున్నారు. అంతెందుకు.. కనీసం తమ ఇంటివాళ్లతో కలిసి సంతోషంగా కాలం గడపలేకపోతున్నారు. ఒక్కమాటలో చెప్పాలంటే.. ఈరోజుల్లో విశ్రాంతికి సమయం కరువైంది. కొందరు నిద్రలేక బాధపడుతుంటే.. మరికొందరు నిద్రపోవటానికి సమయం లేక తీవ్ర సమస్యలు ఎదుర్కొంటున్నారు.

వీటికితోడు సామాజిక వెబ్ సైట్లు కూడా నిద్రకు ఆటంకంగా మారుతున్నాయి. చాలామంది ఫేస్ బుక్, ట్విట్టర్లలో కాలం గడిపేస్తున్నారు. ఇలాగే సాగితే.. త్వరలోనే అనారోగ్య బారిన పడాల్సి వస్తుంది. కాబట్టి.. నిద్ర ఎంతో ముఖ్యం. కనీసం 8 గంటలవరకు నిద్రపోవాలని ఆరోగ్య నిపుణులు సలహాలు ఇస్తున్నారు. అలాంటప్పుడు గాఢమైన నిద్రలో జారుకోవాలంటే అందుకు కొన్ని అనువైన చిట్కాలు అందుబాటులో వున్నాయి. అవేమిటో తెలుసుకుందామా....

* ప్రతిఒక్కరు నిద్రపోయేందుకు ఫిక్స్ డ్ టైం పెట్టుకోవాలి. ఎన్ని కార్యక్రమాలు, పనులు వున్నప్పటికీ.. టైమ్‌కి నిద్రపోయి ఉదయం త్వరగా మేల్కుకునే ప్రణాళికలు సిద్ధం చేసుకోవాలి.

* ఆహారం తీసుకున్న వెంటనే నిద్రకు ఉపక్రమించడం సరికాదు. రాత్రి భోజనానికి, నిద్రకు మధ్య కనీసం రెండు గంటల విరామం వుండేలా చూసుకోవాలి.

* రాత్రివేళ పడుకోవడానికి ముందు స్నానం చేస్తే మరీ మంచిది. ఉదయం నుంచి అలసిపోయి వుంటారు కాబట్టి.. స్నానం చేస్తే మెదడు ఫ్రెష్ అవుతుంది. అప్పుడు అనుకోకుండా నిద్రలోకి జారిపోతారు.

* సాయంత్రం వేళల్లో కాసింత ఒళ్ళు వంచగలిగితే శరీరం అలసినట్టవుతుంది. అంటే.. వ్యాయామం చేయడం అన్నమాట! వ్యాయామం చేయడం ద్వారా కొవ్వు తగ్గడంతో పాటు ఆరోగ్యమూ మెరుగవుతుంది. నిద్ర చక్కగా వస్తుంది.

* రాత్రివేళల్లో లైటు ఉంటేనే కొందరు నిద్రపోతారు. అలాంటి వారు రూల్సు బ్రేక్ చేయాలి. లైట్లు ఆర్పేసి పడుకోవడం అలవాటు చేసుకోగలితే సుఖ నిద్ర సొంతం చేసుకుంటారు.

* బెడ్‌పై స్మార్ట్ ఫోన్లు, ఐపాడ్లు వంటి వాటికి స్థానం కల్పించకూడదు. నిద్రవేళ సంగీతం వినడం కూడా మంచి అలవాటు కాదు. ఆ సమయంలో ప్రశాంతంగా ఉండేందుకే ప్రాధాన్యం ఇవ్వాలి.

* కాఫీకి దూరంగా ఉండాలి. అందులో ఉండే కెఫీన్ నిద్ర వ్యవస్థను దెబ్బ తీస్తుంది. ఆరోగ్యకరమైన డైట్ తీసుకోవాలి.