విలియమ్స్ పై కోహ్లీ మళ్లీ బదులు తీర్చుకున్నాడోచ్..!

Posted: 12/12/2019 08:43 PM IST

టీమిండియా కెప్టెన్ విరాట్ కోహ్లి.. మరోమారు వాంఖేడ్ స్టేడియం వేదికగా వెస్టిండిస్ తో జరిగిన చివరి టీ20 మ్యాచ్లో ఓ అరుదైన సంఘటనతో వార్తల్లో నిలిచాడు. వెస్టిండీస్‌తో జరిగిన మ్యాచ్లో ప్రత్యర్థి ఆటగాడు విలియమ్స్ ను ఉద్దేశించి కోహ్లి ఇప్పటికే ఉప్పల్ స్టేడియంలో బదులుతీర్చుకున్నాడు. తన చేతిని 'నోట్‌బుక్'గా మార్చి.. టిక్‌ కొడుతున్నట్లు చేసిన విన్యాసంతో.. గతంలో తన వికెట్ తీసిని విలియమ్స్ ఇలాంటి విన్యాసాలతోనే సంబరాలు చేసుకున్నాడు. దీంతో అదే విన్యాసాన్ని ప్రదర్శించిన కోహ్లీ బదులు తీర్చుకన్నాడు. ఈ వీడియో గత కొన్ని రోజుల క్రితం సామాజిక మాద్యమాల్లో వైరల్ గా మారింది.

ఇక తాజాగా మళ్లీ అలాంటి విన్యాసాన్నే ప్రదర్శించి వార్తల్లో నిలిచాడు టీమిండియా కెప్టెన్. విండీస్ తో నిన్న జరిగిన నిర్ణయాత్మక మూడో మ్యాచులోనూ చెలరేగిన విరాట్.. మరోమారు కెస్రిక్ విలియమ్స్ ను ఆటపట్టించాడు. 29 బంతుల్లో 70 పరుగులు చేసిన కోహ్లీ, నాలుగు ఫోర్లు, ఏడు సిక్స్ లు బాదాడు. ఈ క్రమంలో కోహ్లీ రియాక్షన్ వీడియో ఒకటి సామాజిక మాధ్యమాల్లో వైరల్ అవుతోంది. వెస్టిండీస్ బౌలర్ కెస్రిక్ విలియమ్స్ ను కోహ్లీ అనుకరించడమే ఇందులో విశేషం.

తొలుత విలియమ్స్ బౌలింగ్ ను ఎదుర్కోవడానికి కాస్తంత ఇబ్బంది పడ్డట్టు కనిపించిన కోహ్లీ, ఆ తరువాత రెచ్చిపోయాడు. విలియమ్స్ బౌలింగ్ లో భారీ సిక్స్ కొట్టిన తరువాత, వికెట్ తీసిన సమయంలో అతను ఎలా సెలబ్రేట్ చేసుకుంటాడో, అలాగే ఆ సిక్స్ ను సెలబ్రేట్ చేసుకున్నాడు. కళ్లు పెద్దవిగా చేసి బాల్ ను చూస్తూ ఆనందించాడు. ఆపై బౌలర్ వద్దకు వెళ్లి తన నోటికి కూడా పని చెప్పాడు. ఈ వీడియో కూడా ప్రస్తుతం నెట్టింట్లో వైరల్ గా మారింది.