దిగ్గజం గణంకాలను దింపేసిన యువ స్పిన్నర్

Posted: 11/07/2019 07:48 PM IST

Nirdesh baisoya emulates anil kumble s feat in u 16 match

అంతర్జాతీయ క్రికెట్ లో భారత దిగ్గజ స్పిన్నర్ అనీల్ కుంబ్లే నమోదు చేసిన గణంకాలను దేశవాళీ క్రికెట్ లో అందుకున్నాడు ఓ యువకెరటం. మేఘాలయకు చెందిన యువ ఆఫ్ స్పిన్నర్ నిర్దేశ్ బైసోయా అసాధారణ ప్రతిభను కనబరిచి సరికొత్త రికార్డును సృష్టించాడు. విజయ్ మర్చంట్ ట్రోఫీలో భాగంగా, అండర్-16 పోటీల్లో పాల్గొన్న నిర్దేశ్, ప్రత్యర్థి నాగాలాండ్ జట్టతో జరుగుతున్న మ్యాచ్ లో అమాంతం అనీల్ కుంబ్లే తరహా ఫీటును నమోదు చేశాడు.

మొత్తం 10 వికెట్లనూ తన ఖాతాలో వేసుకున్నాడు. కేవలం 21 ఓవర్లు బౌలింగ్ చేసిన నిర్దేశ్, ఈలోగానే అరుదైన రికార్డును నమోదు చేశాడు. 21 ఓవర్లలో 10 ఓవర్లు మెయిడెన్లు వేసి, కేవలం 51 పరుగులు మాత్రమే ఇచ్చాడు. ఇతని ధాటికి నాగాలాండ్ జట్టు 113 పరుగులకే ఆలౌట్ అయింది. గడచిన రెండేళ్లుగా అండర్-16 జట్టులో ఆడుతున్న నిర్దేశ్, గత సిరీస్ లో ఆరు మ్యాచ్ లు ఆడి 33 వికెట్లను తన ఖాతాలో వేసుకున్నాడు.

మీరట్ కు చెందిన నిర్దేశ్, ప్రస్తుతం మేఘాలయ జట్టులో ఉన్నాడు. కాగా, దాదాపు 20 సంవత్సరాల క్రితమే అనిల్ కుంబ్లే టెస్ట్ ల్లో పాకిస్థాన్ పై ఒకే ఇన్నింగ్స్ లో 10 వికెట్లు తీసిన సంగతి తెలిసిందే. ఆపై కూచ్ బెహర్ ట్రోఫీలో మణిపూర్ పేసర్ రెక్స్ సింగ్ కూడా ఇదే ఘనత సాధించాడు. ఇటీవలి సీకే నాయుడు ట్రోఫీలో పుదుచ్చేరి లెఫ్ట్ ఆర్మ్ స్పిన్నర్ సిదాక్ సింగ్ కూడా 10 వికెట్లు తీశాడన్న సంగతి తెలిసిందే. 10 వికెట్లు తీసిన నిర్దేశ్ పై క్రికెట్ ప్రపంచం పొగడ్తలు గుప్పిస్తోంది.