గంగూలీ రికార్డులను సమం చేసిన పరుగుల యంత్రం

Posted: 02/02/2018 04:58 PM IST

టీమిండియా పరుగుల యంత్రంగా ఖ్యాతికెక్కిన కెప్టెన్ విరాట్ కోహ్లీ మరో అరుదైన ఘనత అందుకున్నాడు. తాజాగా దక్షిణాఫ్రికాతో జరుగుతున్న వన్డే సిరీస్ లో కోహ్లీ భారత క్రికెట్‌ జట్టు మాజీ సారథి సౌరభ్‌ గంగూలీ రికార్డును సమం చేశాడు. భారత క్రికెట్ జట్టుకు కెప్టెన్ గా గతంలో వ్యవహరించిన మాజీ కెప్టెన్ సౌరవ్ గంగూలీ కెప్టెన్ గా నమోదు చేసిన 11 శతకాలను సమం చేశాడు.

అయితే కెప్టెన్ గా సౌరవ్ గంగూలీ నుంచి పగ్గాలు అందుకున్న ఏ ఒక్కరూ ఇప్పటి వరకూ అయన సెంచరీల రికార్డులను అందుకోలేకపోయారు. తాజాగా కోహ్లీ డర్బన్ వేదికగా ఈ మైలురాయిని చేరుకుని ఆ రికార్డును సమం చేశాడు. దక్షిణాఫ్రికాతో జరిగిన తొలి వన్డేలో కోహ్లీ 112 పరుగులు చేసిన సంగతి తెలిసిందే. కోహ్లీ వన్డే కెరీర్‌లో ఇది 33వ శతకం కాగా కెప్టెన్‌గా 11వది కావడం విశేషం.

గంగూలీ 142 ఇన్నింగ్స్‌ల్లో 11 శతకాలు సాధించగా.. కోహ్లీ కేవలం 41 ఇన్నింగ్స్‌ల్లోనే ఆ ఘనతను అందుకున్నాడు. కాగా, డర్బన్ లో శతకాన్ని నమోదు చేయగానే విరాట్ కోహ్లీ తన బ్యాటును, హెల్మట్ ను మైదానంలో పెట్టి.. తాను గంగూలీ రికార్డుల్ని సమం చేశానన్న విషయాన్ని డ్రెసింగ్ రూమ్ వైపు సంకేతాలతో చూపుతూ చెప్పాడు. తన అగ్రసివ్ నెస్ గురించి మాట్లాడే విమర్శకులు.. అతని రికార్డులను కూడా పరిశీలించాలని విరాట్ కోహ్లీ చెప్పకనే చెప్పినట్లు వుందన్న వారు లేకపోలేరు.