ప్రీమియర్ టెన్నిస్ లీగ్’లో ధ్వజమెత్తిన సానియా జోడీ..

Posted: 11/29/2014 11:36 AM IST

ఐపీఎల్ తరహాలోనే టెన్నిస్’లో కూడా మరో కొత్త లీగ్ ప్రారంభమైంది. మహేష్ భూపతి నేతృత్వంలో మొదలైన అంతర్జాతీయ ప్రీమియర్ టెన్నిస్ లీగ్ (ఐపీటీఎల్)లో ప్రస్తుత, మాజీ ఆటగాళ్లు అందరూ కలిసి ఆడుతున్నారు. శుక్రవారంనాడు తెరలేచిన ఈ లీగ్ తొలి అంచె పోటీలు సింగపూర్’లో ఆరంభమయ్యాయి. మొత్తం నాలుగు జట్లు తలపడుతున్న ఈ లీగ్’లో ఇండియన్ ఏసెస్ శుభారంభం చేసింది. ఇందులో భాగంగానే సానియా మీర్జా, రోహన్ బోపన్న మిక్స్’డ్ డబుల్స్’లో విజయం సాధించి జట్టుకు ఘనమైన ఆరంభాన్నిచ్చారు. సానియా మీర్జా, రోహన్ బోపన్న, అనా ఇవనోవిచ్, సాంటోరో, మోన్‌ఫిల్స్‌లతో కూడిన ఈ జట్టు 26-16 స్కోరుతో సింగపూర్ స్లామర్స్‌ను మట్టికరిపించింది.

ముందుగా ఏకపక్షంగా సాగిన పోరులో సానియా జోడి 6-4తో బ్రూనో సోరెన్, డానియెల హంతుచోవను ఓడించింది. ఆ తర్వాత పురుషుల లెజెండ్ సింగిల్స్‌లో ఫాబ్రిస్ సాంటోరో 6-5తో పాట్రిక్ రాఫ్టర్‌ను ఓడించి జట్టు ఆధిక్యాన్ని మరింత పెంచారు. అయితే పురుషుల మిక్స్’డ్ డబుల్స్’లో మాత్రం చుక్కెదురైంది. బోపన్న, మోన్ ఫీల్స్ 2-6తో నిక్ కిర్గియోస్, థామస్ బెర్డిచ్ చేతిలో ఓడిపోయారు. కానీ మహిళల సింగిల్స్‌లో మాత్రం అనా ఇవనోవిచ్ 6-0తో హంతుచోవాను ఓడించింది. ఆ తర్వాత చివరిగా జరిగిన పురుషుల సింగిల్స్‌లో మోన్‌ఫిల్స్ జట్టు విజయాన్ని పరిపూర్ణం చేశాడు. లీటన్ హెవిట్‌ను 6-1 తేడాతో ఓడించడంతో ఏసెస్ పాయింట్లు గణనీయంగా పెరిగాయి.

AS