నెట్ జనుడికి సానియా మైండ్ బ్లాక్ జవాబు..

Posted: 04/13/2018 04:54 PM IST

పాకిస్తానీ క్రికెటర్ షోయబ్ మాలిక్ ను పెళ్లాడి ఎనమిది వసంతాలు పూర్తి చేసుకున్న టెన్నిస్ స్టార్ సానియా మీర్జాను ఓ వ్యక్తి నీ దేశం ఏదీ అంటూ ప్రశ్నించి.. అమె అగ్రహానికి గురయ్యాడు. అంతేకాదు నెట్టింట్లో తన మర్యాదను, గౌరవాన్ని కూడా పొగొట్టుకున్నాడు. అతని ప్రశ్నకు తాను ఎప్పటికీ భారతీయురాలినేననీ.. భారత్ కోసమే ఆడతానని స్పష్టం చేసిన సానియా.. ఇంతలా స్పందించడానికి కారణమేంటీ..? అంటారా..?.. కాశ్మీర్ లో ఎనిమిదేళ్ల బాలికను అత్యాచారం చేసి ప్రాణాలు తీయడంపై ఇటీవల సానియా మీర్జా ట్విటర్లో స్పందిస్తూ... ‘‘ప్రపంచానికి మనం చూపించాలనుకుంటున్నది నిజంగా ఇలాంటి దేశాన్నేనా? కుల, మత, వర్ణ, ప్రాంతాలకు అతీతంగా మనం ఈ 8 ఏళ్ల బాలిక తరపున నిలబడకపోతే... ప్రపంచంలో ఇక దేనికీ అండగా నిలబడనట్టే. అది మానవత్వం అని కూడా అనిపించుకోదు.. ఈ ఘటన నన్ను తీవ్రంగా కలిచివేస్తోంది...’’ అని పేర్కొంది.
 
సానియా ట్వీట్‌పై ఓ నెటిజన్ స్పందిస్తూ ఆమె జాతీయతను ప్రశ్నించాడు. ‘‘ మేడం.. మీరంటే నాకు చాలా గౌరవం. మీరు ఏ దేశం గురించి మాట్లాడుతున్నారు. మీరు పాకిస్తాన్ వ్యక్తిని వివాహం చేసుకున్నారు. ఇక మీరు ఏమాత్రం ఇండియన్ కాదు. ఒక వేళ మీరు ట్వీట్ చేయాలనుకుంటే పాకిస్తాన్ ఉగ్రమూకలు చంపుతున్న అమాయకులపై కూడా ట్వీట్ చేయండి..’’ అని పేర్కొన్నాడు. అతడి వ్యాఖ్యలపై సానియా కూడా అంతే స్థాయిలో ఘాటుగా స్పందించింది. ‘‘అన్నిటికంటే మొదటిది... ఓ వ్యక్తి ఏదేశం వారినైనా వివాహం చేసుకోవచ్చు. రెండోది.. నేను ఏ దేశస్తురాలినో నీలాంటి అథమ స్థాయి వ్యక్తులు చెప్పక్కర్లేదు. నేను భారత దేశం కోసమే ఆడతాను. నేను ఇప్పటికీ ఎప్పటికీ భారతీయురాలిగానే ఉంటాను. ఒకవేళ నువ్వు దేశం, మతాలకు అతీతంగా ఆలోచించగలిగితే... ఒకనాటికి మానవత్వం వైపు కూడా నిలబడతావు...’’ అంటూ సుతిమెత్తగా చురకలు వేసింది.