క్రికెట్ కి డోపింగ్ మచ్చ

Posted: 07/19/2013 01:25 PM IST

మన భారత దేశంలో ఎంతో మంది ఆదరిస్తున్న క్రికెట్ ఆటకు రోజుకో మచ్చ వచ్చి పడుతుంది. మొన్నటికి మొన్న ఐపీఎల్ లో జరిగిన ఫిక్సింగ్ ఉదంతం మరచిపోక ముందే మరో మరక పడింది. మన ఇండియా క్రికెట్ చరిత్రలో తొలిసారి డోపింగ్ టెస్టులో ఓ క్రికెటర్ పట్టుబడ్డాడు. క్రీడా రంగంలో డోపింగ్ లు సర్వసాధారణమే అయినా, క్రికెట్ లో ఇలాంటి ఉదంతం జరగడం తొలిసారి. ఐపీఎల్ లో కోల్ కత్తా నైట్ రైడర్స్ ఆటగాడు అయిన సాంగ్వాన్ డోపింగ్ చేసి దొరికిపోయాడు. గత రెండు సీజన్ల నుండి కోల్ కత్తాకు ఆడుతున్న సాంగ్వాన్ ఢిల్లీ రంజీ బౌలర్ ప్రదీప్ సాంగ్వాన్ రాండమ్ డోపింగ్ టెస్టులో శాంపిల్ పాజిటివ్‌గా తేలిందని బీసీసీఐ ఉన్నతాధికారి ఒకరు ధ్రువీకరించారు. ఈ సీజన్‌లో కేవలం రెండు మ్యాచ్ లే ఆడిన సాంగ్వాన్ భుజం కారణంగా మిగతా మ్యాచ్ లు ఆడలేదు. లీగ్ సందర్భంగా ప్రదీప్ నిషేధిత ఉత్ప్రేరకాలు వాడినట్లు తేలడంతో ఈ విషయంపై ఢిల్లీ అండ్ డిస్ట్రిక్ట్ క్రికెట్ అసోసియేషన్ (డీడీసీఏ)కు బీసీసీఐ లేఖ రాసింది. లెఫ్టార్మ్ మీడియం బౌలింగ్ చేసే ఇతను 2007లో ఫస్ట్‌క్లాస్ క్రికెట్‌లోకి అడుగుపెట్టాడు. 2008లో మలేసియాలో జరిగిన అండర్-19 వరల్డ్‌కప్‌లో విశేషంగా రాణించి ఒక్కసారిగా అందరి దృష్టినీ ఆకర్షించాడు. గ్రూప్ దశలో దక్షిణాఫ్రికాపై 44 పరుగులకే 5 వికెట్లు తీసి భారత్‌కు చక్కని విజయాన్ని అందించాడు. అయితే సాంగ్వాన్ కావాలని ఉత్పేరకాలు వాడలేదని అతని సన్నిహితులు చెబుతున్నారు. తను బాగా లావవుతున్నందున జిమ్ కోచ్ చెప్పింన మాత్రలు వేసుకున్నాడు తప్పితే ఎటువంటి నిషేదిత ఉత్పేరకాలు వాడలేదని అంటున్నారు. ఒకవేళ దోషిగా తేలితే అతని కెరియర్ ముగిసినట్లేనని అంటున్నారు.