వీరూ వీర విహారం - ముంబయి బేజారు

Posted: 04/22/2013 11:31 AM IST

ఈ సీజన్ లో ఇంత వరకు ఖాతా తెరవకుండా పాయింట్ల పట్టికలో అట్టడుగు స్థానంలో ఉండటమే కాకుండా తన సొంత మైదానంలో కూడా వరుసగా మూడు మ్యాచ్ ల్లో ఓడిపోయి పరువు పోగొట్టుకొన్న ఢిల్లీ డేర్ డెవిల్స్ జట్టు నిన్న ముంబయితో జరిగిన మ్యాచ్ లో సొంత మైదానంలో తన పవర్ ఏంటో చూపించి ఆరు మ్యాచ్ ల ఓటమిని మరచిపోయేలా చేసింది. ఫిరోజ్ షా కోట్ల మైదానంలో జరిగిన ఈ మ్యాచ్ లో వీరేంద్ర సెహ్వాగ్ ఎప్పటికి నేను నేనే అంటూ, తన విశ్వరూపాన్ని చూపిస్తూ తన సహజమైన శైలితో ఆటను రక్తికట్టించి ప్రేక్షకులను వినోదాన్ని పంచాడు. ముందుగా బ్యాటిగ్ చేసిన ముంబయి ఇండియన్స్ 20 ఓవర్లలో నాలుగు వికెట్లకు 161 పరుగులు సాధించింది. సచిన్ టెండూల్కర్ (47 బంతుల్లో 54; 3 ఫోర్లు; 2 సిక్స్), రోహిత్ శర్మ (43 బంతుల్లో 73; 5 ఫోర్లు; 5 సిక్స్) రాణించడంతో ముంబయి భారీ లక్ష్యాన్ని ఢిల్లీ ముందు ఉంచింది.

అనంతరం బ్యాటింగ్ కి దిగిన ఢిల్లీ భారీ లక్ష్యాన్ని చేధించడం కష్టమే అనుకున్నారు ఢిల్లీ ఫాంని చూసి. కానీ ఓపెనర్లు వీరేంద్ర సెహ్వాగ్ 57 బంతుల్లో 95 నాటౌట్; 13 ఫోర్లు; 2 సిక్స్) విజృంభణతో పాటు కెప్టెన్ జయవర్ధనే (43 బంతుల్లో 59; 8 ఫోర్లు; 1 సిక్స్) కూడా రెచ్చిపోవడంతో 162 పరుగుల లక్ష్యాన్ని మరో మూడు ఓవర్లు ఉండగానే ఛేధించింది. తొలి వికెట్‌కు వీరూ, జయవర్థనే 151 పరుగులు జోడించారు. విజయానికి మరో 11 పరుగుల దూరంలో మలింగా బౌలింగ్‌లో జయవర్ధనే ఎల్బీడబ్ల్యుగా వెనుదిరుగగా.. వార్నర్ (7)తో కలిసి ఇన్నింగ్స్‌ను కొనసాగించిన సెహ్వాగ్ ఆఖరు వరకు అజేయంగా నిలిచి మరో మూడు ఓవర్లు మిగిలి ఉండగానే ఢిల్లీకి అద్భుత విజయాన్ని అందించాడు. సెహ్వాగ్ కి మ్యాన్ ఆఫ్ ద మ్యాచ్ అవార్డు దక్కింది.