Posted: 04/23/2013 11:30 AM IST

ఈ సీజన్ ఐపీఎల్ ప్రారంభంలో మ్యాచ్ లు కాస్తంత చప్పగా సాగినా మొన్నటి నుండి ఐపీఎల్ లో ఎవరూ ఊహించని అనూహ్య ఫలితాలు వస్తున్నాయి. భారీ స్కోర్లు నమోదు అవుతున్నాయి. ఫోర్లు, సిక్సర్ల మోతతో మైదానాలు హోరెత్తుతున్నాయి. నిన్న రాత్రి చెన్నైలో రాజస్థాన్ రాయల్స్ , చెన్నై జట్ల మధ్య జరిగిన మ్యాచ్ ప్రేక్షకులను వినోదాన్ని పంచింది. తొలుత బ్యాటింగ్ చేసిన రాజస్థాన్ రాయల్స్ జట్టు నిర్ణీత 20 ఓవర్లలో 185 పరుగుల భారీ స్కోరును నమోదు చేసింది. ఓపెనర్ షేన్ వాట్సన్ 61 బంతుల్లో 101; 6 ఫోర్లు, 6 సిక్సర్లు) అద్భుతమైన ఇన్నింగ్స్ ఆడి సెంచరీ సాధించాడు. రహానే (15 బంతుల్లో 16; 1 ఫోర్) వాట్సన్ తొలి వికెట్‌కు 71 పరుగులు జోడించి జట్టుకు శుభారంభాన్నిచ్చారు. స్టువర్ట్ బిన్నీ (22 బంతుల్లో 36 నాటౌట్; 3 ఫోర్లు, 1 సిక్సర్) వాట్సన్‌కు అండగా నిలవడంతో రాజస్థాన్ భారీ స్కోరును సాధించగలిగింది. దీంతో చెన్నైకి గెలుపు కష్టమే అనుకున్నారు అంతా.

అనంతరం భారీ లక్ష్యాన్ని ఛేదించడానికి బరిలోకి దిగిన చెన్నై ఆది నుండే దూకుడుగా ఆడి భారీ లక్ష్యాన్ని మరో బంతి మిగిలి ఉండగానే ఛేదించి అద్భుతమైన విజయం సాధించింది. ఓపెనర్ మైక్ హస్సీ (51 బంతుల్లో 88; 13 ఫోర్లు, 1 సిక్సర్) సంచలన ఇన్నింగ్స్‌కు సురేశ్ రైనా (35 బంతుల్లో 51; 4 ఫోర్లు, 2 సిక్సర్లు) మెరుపు అర్ధసెంచరీ తోడవడంతో చెన్నై గెలుపు సులభం అయింది. ఐపీఎల్ ఆరో సీజన్‌లో తొలి శతకం షేన్ వాట్సన్ చేశాడు. అయితే ఈ ఆనందం ఎంతో సేపు నిలవలేదు. ప్రత్యర్థి జట్టులో మరో ఆసీస్ ఆటగాడు హస్సీ బ్యాటింగ్ ముందు వాట్సన్ శతకోత్సాహం మ్యాచ్ ముగిసేలోపే కనుమరుగైపోయింది. చెన్నై విజయంలో కీలక పాత్ర పోషించిన మైక్ హస్సీకి మ్యాన్ ఆఫ్ ద మ్యాచ్ అవార్డు లభించింది.