రేవంత్ రెడ్డి, దయాకర్ రావు కలిసిపోయారా.?

Posted: 09/15/2015 05:30 PM IST

తెలుగుదేశం పార్టీలో ఫైర్ బ్రాండ్ గా ఎదిగిన రేవంత్ రెడ్డి, సీనియర్ నేత ఎర్రబెల్లి దయాకర్ రావుకు మధ్య పెద్ద అగాదం ఉందని అందరికి తెలుసు. పార్టీలో నేనంటే నేనంటూ ఇద్దరి మధ్య పోటీ నడుస్తోందని అందరూ అనుకుంటున్నారు. ఎంతో కాలంగా పార్టీకి పట్టుగా నిలుస్తూ. పార్టీని ఆదుకున్న ఎర్రబెల్లికి పార్టీలో సీనియర్ నేతగా మంచిపేరుంది. ఇక రేవంత్ రెడ్డి ఒక్కో మాట తూటాలా పేలుతుంది. తెలంగాణ ముఖ్యమంత్రి కేసీఆర్ మీద, తెలంగాణ ప్రభుత్వం మీద మాటల దాడి చెయ్యడంతో రేవంత్ రెడ్డి దిట్ట. అందుకే పార్టీలో రేవంత్ మాటకు ఎంతో విలువ ఉంది. తెలంగాణ టిడిపిలో రేవంత్ రెడ్డి ఫైర్ బ్రాండ్ గా మారడానికి కూడా ఇదే కారణం. అయితే ఇద్దరూ ఇద్దరే.. ఎవరికి వారే అన్నట్లు వ్యవహరించిన తీరే పార్టీకి తలనొప్పిగా మారింది. ఎంతకీ తెలంగాణ టిడిపిలో మార్పు రాకపోవడంతో చివరకు ఓ నిర్ణయానికి వచ్చినట్లు తెలుస్తోంది.

ఓటుకు నోటు వ్యవహారం తర్వాత రేవంత్ రెడ్డి అరెస్టు, విడుదల జరిగిపోయాయి. రేవంత్ కు పూర్తి స్థాయి స్వేచ్ఛనిస్తూ హైకోర్టు తీర్పునిచ్చిన తర్వాత మొదటిసారిగా హైదరాబాద్ కి వచ్చారు. అయితే హైదరాబాద్ లోని ఎల్ బి నగర్ లోని ఓ కార్యక్రమానికి రేవంత్ తో పాటు పార్టీ సినియర్ నాయకులు ముఖ్యంగా ఎర్రబెల్లి దయాకర్ రావు రావాల్సి ఉంది. కానీ దయాకర్ రావు ఆ కార్యక్రమానికి హాజరుకాలేదు. ఆత్మహత్య చేసుకొని చనిపోయిన రైతు లింబయ్య కుటుంబాన్ని పరామర్శించేందుకు టిడిపి శ్రేణులు అందరూ కలిసి వెళ్లాల్సి ఉన్నా అది కూడా జరగలేదు. రేవంత్ రెడ్డి ఒంటరిగా అక్కడికి వెళ్లారు. ఇలా రేవంత్ కు, దయాకర్ రావుకు మధ్య పెరుగుతున్న దూరానికి తాత్కాలికంగా తెర పడినట్లు తెలస్తోంది. రేవంత్ రెడ్డి, దయాకర్ రావుల మధ్య సంది కుదిరిందని.. అందులో భాగంగా పార్టీకి రేవంత్ రెడ్డి అన్ని రకాలుగా సహకరిస్తానని హామీ ఇచ్చారని. .దీనికి దయాకర్ రావు కూడా ఒప్పుకున్నారని సమాచారం. మరి అన్నీ మరిచిపోయి దోస్త్ మేరా దోస్త్ అని పాటపాడతారో. ఎవరి పాట వాళ్లే పాడుకుంటారో చూడాలి.

*అభినవచారి*