కొలెస్టిరాల్ ను తగ్గించే ఆహారపదార్థాలు!

Posted: 10/16/2014 03:49 PM IST

ప్రస్తుతకాలంలో కొలెస్టిరాల్ సమస్య గణనీయంగా పెరిగిపోతోంది. పోషక విలువలు ఎక్కువగా వున్న ఆహారపదార్థాలను పక్కనపెట్టేసి... పిజ్జా, బర్గర్లు వంటి జంక్ ఫుడ్స్ తీసుకోవడం వల్ల కొలెస్టిరాల్ సమస్య ఎక్కువగా పెరిగిపోతోందని నిపుణులు తెలుపుతున్నారు. మానవ శరీరానికి ఉపయోగంలేని కొలెస్టిరాల్ ఆరోగ్యానికి ఎంతో హాని కలిగిస్తుంది. రక్తప్రసరణ సరిగ్గా జరగకపోవడంతోపాటు గుండెపోటు రావడానికి కూడా ఆస్కారం వుంటుంది. ఒబెసిటీకి కూడా ఈ కొలెస్టిరాలే ప్రధాన కారణం. అటువంటి సమయాల్లో కొలెస్టిరాల్ ను తగ్గించుకునే కొన్ని ఆహారపదార్థాలను తీసుకుంటే... ఎంతో ఆరోగ్యంగా వుండొచ్చు.

1. ఇటీవల నిర్వహించిన కొన్ని అధ్యయనాల ప్రకారం... ఓట్స్, బాదం, పిస్తా వంటి ధాన్యాలను నిత్యం తీసుకుంటే అవి చాలావరకు శరీరంలో కూరుకుపోయిన అనవసరమైన కొలెస్టిరాల్ ను కరిగిస్తాయని నిపుణులు సూచిస్తున్నారు.

2. అధికంగా పీచును కలిగివుండే సోయాను ఆహారంలో చేర్చుకోవడం ద్వారా బరువును నియంత్రించవచ్చు. సోయా మిల్క్, పచ్చి బఠాణీలను ఆహారంలో చేర్చుకోవాలి.
 
3. ఉసిరిలోని గింజల్ని తీసేసి.. దానిని బాగా పిండుకోవాలి. ఆ రసంలో కాస్త అల్లం రసాన్ని కలిపి.. రోజూ ఉదయం తాగితే కొలెస్ట్రాల్ కరిగిపోతుంది. ఇంకా గోరువెచ్చని నీటిలో ఒక టీ స్పూన్ కలుపుకుని తాగితే బరువు తగ్గుతుంది.

4. బాదం పౌడర్‌లో కాసింత తేనె కలుపుకుని ఉదయం అల్పాహారానికి తర్వాత తీసుకుంటే బరువు తగ్గుతారు. క్యారెట్‌తో పాటు తేనె కలుపుకుని తీసుకుంటే కొలెస్ట్రాల్ తగ్గుతుంది.

5. కీరదోస, ఉసిరి, క్యాబేజీ, కొత్తిమీర, మునక్కాయ, ద్రాక్ష, ఆరెంజ్, టమోటో, బొప్పాయి, అనాస, నిమ్మ, జామ, పుదీనా, ఉల్లి, పుచ్చకాయ, కరివేపాకు రసాలను తీసుకుంటే శరీర బరువు తగ్గిపోతుందని ఆరోగ్య నిపుణులు అంటున్నారు.