టైటిల్ కు అడుగు దూరంలో నిలిచిన ‘సింధూ’రం

Posted: 11/19/2016 06:07 PM IST

భారత స్టార్‌ షట్లర్, రియో ఒలింపిక్స్ రజత పతక విజేత పీవీ సింధు మరో సంచలన విజయానికి అమడ దూరంలో నిలిచింది. చైనా ఓపెన్‌ సూపర్ సిరీస్‌ బ్యాడ్మింటన్‌ టోర్నమెంట్‌లో తన సత్తాను చాటుకుంటూ ప్రత్యర్థులను చిత్తు చేస్తూ ముందుకు దూసుకెళ్తోంది. కెరీర్‌లో తొలి సూపర్ సిరీస్ టైటిల్‌ను సాధించేందుకు కేవలం అడుగుదూరంలో నిలిచింది.

తొలి రౌండ్ నుంచి తన అత్యుత్తమ ప్రతిభను చాటుకుంటూ దూసుకెళ్లిన హైదరాబాదీ సింధూ.. ప్రస్తుతం ఈ ఈవెంట్‌లో ఫైనల్లో ప్రవేశించింది. హోరాహోరీగా జరిగిన మహిళల సింగిల్స్ సెమీస్‌లో ఏడో సీడ్‌ సింధు 11-21, 23-21, 21-19 స్కోరుతో ఆరో సీడ్‌ సుంగ్ జి హ్యున్‌పై విజయం సాధించింది. రేపు (అదివారం) జరిగే ఫైనల్లో సున్‌ యుతో తలపడనుంది.

సెమీస్‌ పోరులో సింధుకు గట్టి పోటీ ఎదురైంది. మ్యాచ్‌ ఆరంభంలో సుంగ్‌ను నిలువరించడంలో విఫలమైంది. తొలి గేమ్‌ను కోల్పోయిన సింధు వెంటనే పుంజుకుని సత్తాచాటింది. నువ్వా నేనా అన్నట్టు సాగిన చివరి రెండు గేమ్‌లను గెలిచి మ్యాచ్‌ను సొంతం చేసుకుంది.