పదివేల పరుగుల మైలురాయిని అధిగమిచిన ధోని

Posted: 01/12/2019 05:02 PM IST

మిస్టర్ కూల్ మహేంద్రసింగ్ ధోని భారత్ తరఫున వన్డేల్లో పది వేల పరుగులు పూర్తి చేశాడు. సిడ్నీ వేదికగా ఆస్ట్రేలియాతో జరుగుతున్న తొలి వన్డేలో రిచర్డ్‌సన్ బౌలింగ్‌లో స్క్వేర్ లెగ్ దిశగా సింగిల్ తీసి ఈ మైలురాయిని అందుకున్నాడు. 334వ వన్డే ఆడుతున్న ధోనీ.. భారత్ తరఫున పదివేల పరుగులు పూర్తి చేసిన ఐదో ఆటగాడిగా రికార్డులకెక్కాడు. భారత్ తరఫున ఇప్పటి వరకూ సచిన్ టెండూల్కర్ (18,426), సౌరవ్ గంగూలీ (11,363), రాహుల్ ద్రవిడ్ (10,889), విరాట్ కోహ్లీ (10,235) 10 వేల పరుగులు మైలురాయిని అందుకున్నారు.

వాస్తవానికి గత ఏడాది జూలైలోనే మహేంద్రసింగ్ ధోని పది వేల పరుగుల మైలురాయిని అందుకున్నాడు. కానీ.. అందులో 174 పరుగులు ఆసియా ఎలెవన్ తరఫున చేశాడు. 2007లో ఆఫ్రికా ఎలెవన్, ఆసియా ఎలెవన్ మధ్య జరిగిన ఆ టోర్నీలో.. మూడు వన్డేలాడిన ధోనీ 174 పరుగులు చేశాడు.

గతేడాది స్వదేశంలో వెస్టిండీస్‌తో జరిగిన ఐదు వన్డేల సిరీస్‌లో ధోనీ ఈ ఫీట్‌ను అందుకోవాల్సింది. కానీ విండీస్‌తో మూడు వన్డేల్లో మాత్రమే మహీకి బ్యాటింగ్ చేసే అవకాశం వచ్చింది. ఆ సిరీస్‌లో మహీ 20, 7, 23 చొప్పున మాత్రమే రన్స్ చేశాడు. తిరువనంతపురం వేదికగా నవంబర్ 1న జరిగిన చివరి వన్డేలో ధోనీకి బ్యాటింగ్ చేసే అవకాశం లభించలేదు. దీంతో భారత గడ్డపై పూర్తి చేయాల్సిన పది వేల పరుగులను ఆస్ట్రేలియాలో పూర్తి చేశాడు. 72 రోజుల నిరీక్షణ, 9100 కి.మీ. ప్రయాణం (త్రివేండ్రం-సిడ్నీ)అనంతరం ధోనీ ఈ ఫీట్ సాధించాడన్నమాట.