కోహ్లీ కన్నా రోహిత్ శర్మ బెస్ట్: మాజీ చీఫ్ సెలక్టర్

Posted: 12/26/2017 07:33 PM IST

వన్డేలో మూడు పర్యాయాలు డబుల్ సెంచరీని సాధించి.. ఇక పోట్టి ఫార్మెట్ క్రికెట్ గా ఖ్యాతికెక్కిన టీ20లో కేవలం 35 బంతుల్లోనే సెంచరీని సాధించడం.. వీటికి తోడు తాత్కాలిక కెప్టెన్నీ పగ్గాలను కూడా సక్రమంగా నిర్వర్తించిన ఇండియన్ ఓపెనర్ రోహిత్ శర్మకు దేశ, విదేశీ క్రికెట్ అభిమానులు, క్రికెటర్ల నుంచి అభినందనలు వెల్లివిరుస్తూనే వున్నాయి. ఈ నేపథ్యంలో తెరపైకి వచ్చిన టీమిండియా మాజీ చీఫ్ సెలక్టర్ సందీప్ పాటిల్.. కెప్టెన్ విరాట్ కోహ్లి కంటే ఓపెనర్ రోహిత్ శర్మనే బెస్ట్ బ్యాట్స్‌మెన్ అని అభిప్రాయాన్ని వ్యక్తం చేశారు.

కోహ్లి అభిమానులు ఈ మాటని ఒప్పుకున్నా లేక ఓప్పుకోకపోయినా ఇది మాత్రం వాస్తవమని ఆయన పునరుద్ఘాటించారు. తాజాగా మీడియాతో మాట్లాడిన సందీప్ పాటిల్ కొన్ని ఆసక్తికర వ్యాఖ్యలు చేశాడు. కోహ్లి కంటే రోహిత్ శర్మనే మెరుగైన బ్యాట్స్ మెన్ అన్నారు. అయితే విరాట్ కోహ్లి కూడా అత్యంత ప్రతిభ కలిగిన గొప్ప క్రికెటర్ అని.. ఇందులో ఎలాంటి సందేహం లేదని అన్నాడు. అయితే.. అతను భారత్ జట్టు అత్యుత్తమ టెస్టు బ్యాట్స్ మెన్ అని అభిప్రాయపడ్డాడు.

పరిమిత ఓవర్ల క్రికెట్ లో కోహ్లి కంటే రోహిత్ శర్మ కొంచెం ముందు ఉన్నాడని పాటిల్ వివరించారు. వన్డే, టీ20 జట్టులో మెరుగ్గా రాణిస్తున్న రోహిత్ శర్మ.. ఇటీవలే టెస్టు జట్టులోనూ సుస్థిర స్థానం సంపాదించుకుని మెరుపు ఇన్నింగ్స్‌లు ఆడుతున్నాడు. రోహిత్ వేగవంతమైన షాట్ సెలక్షన్ వన్డే, టీ20లకి బాగా నప్పుతుందన్నారు. ఇటీవల శ్రీలంకతో జరిగిన వన్డే సిరీస్లో జట్టు తాత్కాలిక కెప్టెన్‌గా డబుల్ సెంచరీ బాదిన రోహిత్ శర్మ.. టీ20లో మెరుపు శతకం సాధించిన విషయం తెలిసిందే. అతని జోరుతో భారత్ జట్టు శ్రీలంకపై 2-1తో వన్డే సిరీస్‌ని.. 3-0తో టీ20 సిరీస్‌ని చేజిక్కించుకుంది.