ఐసీసీ టెస్టు ర్యాకింగ్ లో ఎగబాకిన పాక్

Posted: 11/05/2015 08:26 PM IST

ఇంగ్లాండ్‌తో జరిగిన టెస్టు సిరీస్ లో 2-0తో విజయాన్ని నమోదు చేసుకున్న పాకిస్థాన్ తాజాగా ప్రకటటిచిన ఐసీసీ టెస్టు ర్యాంకింగ్స్ లో తమ స్థానాన్ని మెరుగుపర్చుకుంది. రెండు స్థానాలు ఎగబాకి తాజాగా ప్రకటించిన ప్రపంచ టెస్ట్ ర్యాంకింగ్స్‌లో ద్వితీయ స్థానానికి చేరుకుంది. దీంతో టీమిండియా ఒక స్థానం ఎగబాకి నాల్గవ స్థానానికి చేరుకుంది. గురువారం షార్జాలో ముగిసిన మూడో టెస్టులో మిస్బావుల్ హక్ నేతృత్వంలోని పాకిస్థాన్ ఇంగ్లాండ్ జట్టుపై 127 పరుగుల తేడాతో గెలిచి సిరీస్‌ను 2-0తో కైవసం చేసుకుంది. ఈ విజయంతో 4వ స్థానంలో ఉన్న పాక్, 2 స్థానాలు ఎగబాకి అంతర్జాతీయ టెస్ట్ ర్యాంకింగ్స్‌లో ద్వితీయ స్థానానికి చేరుకుంది. అలస్టర్ కుక్ నేతృత్వంలోని ఇంగ్లాండ్ మూడో స్థానం నుంచి ఏకంగా 6వ స్థానానికి పడిపోయింది.

2006 తర్వాత పాకిస్థాన్ ద్వితీయ స్థానం రావడం ఇదే తొలిసారి. ఈ గెలుపుతో పాకిస్థాన్ 5 పాయింట్లు సాధించగా(101 నుంచి 106కు), సిరీస్ ఓటమి పాలైన ఇంగ్లాండ్ 3 పాయింట్లు చేజార్చుకుని 102 నుంచి 99 పాయింట్లకు పడిపోయింది. కాగా, ఇండియా-దక్షిణాఫ్రికా మధ్య జరుగుతున్న 4 టెస్ట్ మ్యాచుల సిరీస్‌లో రాణిస్తే భారత ర్యాంకు మరిత మెరుగుపడే అవకాశం ఉంటుంది. ప్రస్తుతం దక్షిణాఫ్రికా అగ్రస్థానంలో ఉంది. ఒకవేళ భారత్ టెస్ట్ సిరీస్‌ను 4-0తో గెలిస్తే ద్వితీయ స్థానానికి ఎగబాకే అవకాశం ఉంటుంది.

జట్టు            రేటింగ్ పాయింట్స్
1. దక్షిణాఫ్రికా        125  
2. పాకిస్థాన్          106
3. ఆస్ట్రేలియా         106
4. ఇండియా          100
5. న్యూజిలాండ్        99
6. ఇంగ్లాండ్           99
7. శ్రీలంక              93
8. వెస్టిండీస్           76
9. బంగ్లాదేశ్          47
10. జింబాబ్వే           5

జి. మనోహర్