ధోనీకి జార్ఖండ్ ప్రభుత్వం ‘ట్విస్టింగ్’ నోటీసులు

Posted: 05/09/2015 10:07 AM IST

టీమిండియా కెప్టెన్ మహేంద్రసింగ్ ధోనీకి జార్ఖండ్ ప్రభుత్వం ఓ ట్విస్టింగ్ నోటీసులు జారీ చేసింది. ఈ వ్యవహారంలో ధోనీ చేసిన తప్పేమీ లేదు కానీ.. కొందరు అధికారులు చేసిన అత్యుత్సాహమే ధోనీకి నోటిసులు జారీ అయ్యేలా కారణమైంది. ‘పొరపాటున కేటాయించిన స్థలాన్ని ఎందుకు రద్దు చేయకూడదో’ తెలిపాలంటూ ఈ నోటీసు సారాంశం! ఈ నోటిసులు వచ్చిన అనంతరం ధోనీసైతం ఖంగుతినక తప్పలేదు. అనుకోకుండా జరిగిన ఈ పరిణామం ప్రస్తుతం హాట్ టాపిక్ గా మారింది.

వివరాల్లోకి వెళ్తే.. దేశానికి ధోనీ చేస్తున్న సేవలకు గుర్తింపుగా రాంచీలోని ఓ హౌసింగ్ సొసైటీలో ప్రభుత్వం ఇంటి స్థలాన్ని కేటాయించింది. అధికారులు అత్యుత్సాహంతో ఆ స్థలం పక్కనే మరో ఖాళీజాగాను కూడా ధోనీ పేరిట రాసేశారు. అయితే.. తర్వాత తమ నాలిక్కర్చుకున్నారు. ఇప్పుడు దాన్ని వెనక్కి తీసుకోవాలంటే నిబంధనల ప్రకారం వెళ్లక తప్పదు కాబట్టి.. పొరపాటున కేటాయించిన ఆ స్థలాన్ని ఎందుకు వెనక్కి తీసుకోరాదో చెప్పాలని నోటిసులు పంపించిందట! ఇదీ అసలు వ్యవహారం! మరి.. దీనిపై ధోనీ ఎలా స్పందిస్తాడో?