మాస్టర్ కు బర్త్ డే గిప్టుగా

Posted: 04/25/2013 11:29 AM IST

క్రికెట్ దేవుడు మాస్టర్ కి తన పుట్టిన రోజు నాడు ముంబయి జట్టు బర్త్ డే గిఫ్ట్ గా ఘన విజయాన్ని అందించింది. ఉదయం నుండి బర్త్ డే వేడుకల్లో సందడిగా గడిపిన సచిన్ కి సాయంత్రం జట్టు విజయాన్ని అందించి మరింత సంతోషాన్ని పంచారు. కొల్ కత్తాలో నైట్ రైడర్స్ తో జరిగిన మ్యాచ్ లో ముంబయి విజయం సాధించింది. సొంత మైదానంలో నైట్ రైడర్స్ కథ మాత్రం మారలేదు. మొదట బ్యాటింగ్ చేసిన కోల్ కత్తాకి ఆరంభం బాగానే లభించి, 159 పరుగుల భారీ స్కోరు సాధించినా విజయాన్ని మాత్రం దక్కించుకోలేక పోయింది. సరికొత్త మార్పుతో యూసఫ్ పఠాన్‌తో ఓపెనింగ్ భాగస్వామ్యాన్ని పంచుకున్న గంభీర్ 26 పరుగులు చేయగా.. ఆరంభంలోనే సిక్స్, ఫోర్లుతో వీరంగం చేసిన పఠాన్ వ్యక్తిగత 19 పరుగులకే వెనుదిరిగినా, మిడిలార్డర్‌లో కల్లీస్ 37, తివారీ 33, మోర్గాన్ 31 పరుగులు చేసి ముంబై బౌలర్లను సమర్ధవంతంగా ఎదుర్కొన్ని భారీ లక్ష్యాన్ని ముంబయి ముందు ఉంచారు.

అనంతరం లక్ష్యాన్ని ఛేదించడానికి బరిలోకి దిగిన ముంబయి ఇండియన్స్ ఓపెనర్ బ్యాట్స్ మెన్ స్మిత్ బాధ్యతాయుతమైన ఇన్నింగ్స్ ఆడి 62 పరుగులు సాధించాడు. బర్త్ డే బాయ్ సచిన్ (2) నిరాశ పరిచినా మిడిలార్డర్ బ్యాట్స్ మెన్స్ రోహిత్ శర్మ 34, పొలార్డ్ 33, పరుగులు చేయరు.. చివర్లో రాయుడు 13, హర్భజన్ 7 పరుగులతో అజేయంగా నిలిచి మరో బంతి మిగిలి ఉండగానే ముంబైకి విజయాన్ని అందించారు. దీంతో ముంబయి పరాజయాలకు బ్రేక్ పడింది. ముంబయి జట్టుకు మొదటి సారి కెప్టెన్ గా వ్యవహరించిన రోహిత్ శర్మ తొలి కెప్టెన్ గా తొలి విజయాన్ని తన ఖాతాలో వేసుకున్నాడు.