Posted: 03/25/2013 11:06 AM IST

భారత క్రికెట్ టెస్టు చరిత్రలో ఇదో గొప్ప విజయం. ఇంత వరకు ఎప్పుడు క్లిన్ స్విప్ చేయలేని టీంఇండియా ఆస్ట్రేలియాతో జరిగిన బోర్డర్ గవాస్కర్ ట్రోఫీ సిరీస్ లో క్లిన్ స్విప్ చేసి, చరిత్రలో తన పేరును సువర్ణాక్షరాలతో లిఖించే విధంగా చేరుకుంది. పోయిన సంవత్సరం విదేశీ గడ్డపై, స్వదేశంలో జరిగిన కొన్ని సిరీస్ లో పరాజయాల పాలైన అనేక విమర్శలు ఎదుర్కొన్న ధోని సేన విజయం సాధించి ఆస్ట్రేలియా పై ఉన్న కసిని, కోపాన్ని తీర్చుకుంది. 43 ఏళ్ల తర్వాత ఇంత చెత్తగా (0-4తో వైట్‌వాష్) ఓడిన జట్టుగా ఆస్ట్రేలియా అప్రదిష్ట మూటగట్టుకుంది . నాలుగు మ్యాచ్‌ల సిరీస్‌లో భాగంగా ఇక్కడి ఫిరోజ్ షా కోట్లా మైదానంలో జరిగిన చివరి టెస్టులో భారత్ ఆరు వికెట్లతో ఘన విజ యం సాధించింది.

ఆటకు మూడోరోజైన ఆదివారం ఆసీస్ నిర్దేశించిన 155 పరుగుల స్వల్ప లక్ష్యాన్ని ధోనీసేన 31.2 ఓవర్లలో నాలుగు వికెట్లు కోల్పోయి ఛేదించింది. పుజారా (92 బంతుల్లో 11 ఫోర్లతో 82 నాటౌట్) అజేయ హాఫ్ సెంచరీతో రాణించ గా.. కోహ్లీ (60 బంతుల్లో 4 ఫోర్లతో 41) విజయంలో కీలకపాత్ర పోషించాడు. అంతకుముందు ఓవర్‌నైట్ స్కోరు 266/8తో మూడోరోజు ఉదయం తొలిఇన్నింగ్స్ కొనసాగించిన భారత్ మరో ఆరు పరుగులు మాత్రమే జతచేసి మిగిలిన రెండు వికెట్లు కోల్పోయింది. దీంతో భారత్‌కు 10 పరుగుల స్వల్ప ఆధిక్యం లభించింది. అనంతరం రెండో ఇ న్నింగ్స్‌కు దిగిన కంగారూలు.. భారత స్పిన్‌త్రయం జడేజా (5/58), ఓఝా (2/19), అశ్విన్ (2/55) ధాటికి 46.3 ఓవర్లలో 164 పరుగులకే చేతులెత్తేసింది. జడేజాకు 'మ్యాన్ ఆఫ్ ద మ్యాచ్ ' దక్కగా, సిరీస్‌లో 29 వికెట్లు పడగొట్టి కుంబ్లే రికార్డు (27) ను అధిగమించిన అశ్విన్ 'మ్యాన్ ఆఫ్ ద సిరీస్ ' సొంతం చేసుకున్నాడు.