Posted: 03/11/2013 08:27 PM IST

బ్యాటింగ్‌లో విఫలమైన తెలుగు వారియర్స్ జట్టు... సెలబ్రిటీ క్రికెట్ లీగ్ (సీసీఎల్)లో రన్నరప్‌తో సరిపెట్టుకుంది. ఆదివారం చిన్నస్వామి స్టేడియంలో జరిగిన ఫైనల్లో కర్ణాటక బుల్‌డోజర్స్ 26 పరుగుల తేడాతో వారియర్స్‌పై విజయం సాధించింది. వరుసగా మూడోసారి ఫైనల్‌కు దూసుకొచ్చిన కర్ణాటక ఈసారి మాత్రం అవకాశాన్ని జారవిడుచుకోలేదు. టైటిల్ పోరులో పటిష్టమైన వారియర్స్‌కు అడ్డుకట్ట వేసి చాంపియన్‌గా నిలిచింది. టాస్ గెలిచి బ్యాటింగ్‌కు దిగిన కర్ణాటక బుల్‌డోజర్స్ 20 ఓవర్లలో 5 వికెట్లకు 148 పరుగులు చేసింది. తర్వాత బ్యాటింగ్‌కు దిగిన వారియర్స్ 20 ఓవర్లలో 7 వికెట్లకు 122 పరుగులు చేసి ఓటమిపాలైంది. తేజ (23 బంతుల్లో 31; 1 ఫోర్, 4 సిక్సర్లు) టాప్ స్కోరర్. ఆదర్శ్ (33 బంతుల్లో 22; 1 ఫోర్), నందకిశోర్ (11 బంతుల్లో 29 నాటౌట్; 3 ఫోర్లు, 2 సిక్సర్లు), గిరి (15 బంతుల్లో 16; 2 ఫోర్లు) కాసేపు పోరాడారు. ఆరంభంలో వికెట్లు కోల్పోవడం వారియర్స్‌ను దెబ్బతీసింది. ఓపెనర్లు ప్రిన్స్ (5), ఆదిత్య (5) విఫలమయ్యారు. కర్ణాటక బౌలర్లలో అభిమన్యు 2, హిమ్మత్, కార్తీక్, ప్రదీప్, మంజునాథ్ తలా ఓ వికెట్ పడగొట్టారు.