Posted: 03/09/2013 01:50 PM IST

క్రీడా రంగంలో ఎంతో ప్రతిష్టాత్మంగా భావించి ఒలంపిక్స్ క్రీడల్లో మన భారత దేశానికి బాక్సింగ్ విభాగంలో తొలి పతకాన్ని అందించిన బాక్సర్ విజేందర్ సింగ్ మెడకు డ్రగ్స్ కుంభకోణం చుట్టుకుంది. గతంలో క్రీడా రంగంలో ఎన్నో మ్యాచ్ ఫిక్సింగ్ లు, డోపింగ్ టెస్టుల్లో దోషులుగా తేలిన సందర్భాలు ఉన్నాయి కానీ, ఓ క్రీడాకారుడికి డ్రగ్స్ మాఫియాతో సంబంధాలు ఉన్నాయని తేలడం ఇదే మొదటిసారి కావచ్చు. చండీగఢ్ శివారులో ఉన్న జిరాక్‌పూర్‌లోని ఓ ప్రవాస భారతీయుని ఇంట్లో గురువారం సాయంత్రం పంజాబ్ పోలీసులకు భారీ స్థాయిలో 26 కిలోల హెరాయిన్ పట్టుబడింది. రూ.130 కోట్ల విలువైన మాదక ద్రవ్యాలు దొరికిన ఈ ఫ్లాట్ బయట విజేందర్ భార్య కారు ఉండటం అనుమానాలకు తావిచ్చింది. ఈ విషయం ఓ డీలర్ ద్వారా విషయం బయటపడింది. దీంతో దీని వెనుక ఉన్న మాఫియా బండారం బయటకు వచ్చింది. ఈ కేసులో విజెందర్ కి ఉన్న సంబంధం ఏమిటన్నది తేలాలి.   ఈ విషయం పై స్పందించిన విజెందర్ సింగ్ జిరాక్‌పూర్‌లోని ఫ్లాట్ వద్దకు ఆ కారు ఎలా చేరిందో నాకు తెలీదు. నన్ను విమానాశ్రయం వద్ద దింపాక నా స్నేహితులు ఆ కారును వాడి ఉంటారు. ఇందులోకి నా పేరును ఎందుకు లాగుతున్నారో అర్థం కావడం లేదు. నాకు ఏపాపం తెలియదని అంటున్నాడు. అయితే క్రీడాకారులు చాలా మందే తన స్టామినాను పెంచుకోవడానికి డ్రగ్స్ తీసుకుంటారు. మరోవైపు ఈ కేసులో మరో ఇద్దరిని పోలీసులు అరెస్ట్ చేశారు. వీరి దగ్గరి నుంచి రూ. కోటి నగదు, 20 కిలోల కెమికల్స్‌ను స్వాధీనం చేసుకున్నట్టు లూధియానా రేంజి డీఐజీ ఎం ఫరూఖి తెలిపారు. అయితే బాక్సర్ విజేందర్‌కు డ్రగ్స్ కేసులో సంబంధాలపై ఇప్పటిదాకా ఏమీ తేలలేదని, విచారణ సాగుతోందని చెప్పారు. కానీ విజెందర్ కి ఇందులో హస్తం ఉందో లేదో తెలియాల్సి ఉంది. ఒకవేళ అతని హస్తం ఉన్నట్లు రుజువు అయితే అతని కెరియర్ క్లోజ్ అయినట్లే.