Posted: 02/04/2013 01:00 PM IST

ఈ సంవత్సరం జరిగే ఇండియన్ ప్రీమియర్ లీగ్ ఆరో సీజన్ కోసం ఆటగాళ్ళ వేలం నిన్న జరిగింది. ఈ వేలంలో ఆటగాళ్ళు ఫ్రాంఛైజీల మనస్సులను గెలుచుకొని, కోట్లు కొల్లగొట్టారు. చెన్నైలో జరిగిన వేలంలో ఆస్ట్రేలియా ఆల్ రౌండర్ గ్లెన్ మాక్స్‌వెల్‌కు వేలంలో అత్యధిక ధర పలికింది. ఈ ఆటగాడిని ఏకంగా 10 లక్షల డాలర్ల (భారత కరెన్సీలో రూ.5.31 కోట్లు)కు ముంబై ఇండియన్స్ జట్టు కొనుగోలు చేసింది. వేలానికి ముందు అందరి దృష్టి మైకేల్ క్లార్క్, రికీ పాంటింగ్‌పై ఉన్నప్పటికీ వీరిని సాధారణ రేటుకే కొనుగోలు చేశారు.

ఇక అత్యధిక కనీస రేటు ఉన్న క్లార్క్, పాంటింగ్‌లను అదే రేటు (రూ.2.12 కోట్లు)కు పుణే వారియర్స్, ముంబై ఇండియన్స్ కొనుగోలు చేసింది. శ్రీలంక మిస్టరీ స్పిన్నర్ అజంతా మెండిస్ వేలంలో రెండో స్థానాన్ని సంపాదించాడు. కేవలం 50 వేల డాలర్ల కనీస ధర ఉన్న మెండిస్‌ను పుణే వారియర్స్ రూ.3 కోట్ల 85 లక్షలకు కొనుగోలు చేసింది. ఆసీస్ పేసర్ డిర్క్ నేన్స్‌ను చెన్నై సూపర్ కింగ్స్ 6 లక్షల డాలర్ల (రూ. 3 కోట్ల 18 లక్షలు)కు, దక్షిణాఫ్రికా ఆల్‌రౌండర్ జోహన్ బోథాను ఢిల్లీ డేర్‌డెవిల్స్ రూ.2.3 కోట్లకు తీసుకుంది. ఈ వేలంలో తొమ్మిది ఫ్రాంచైజీలు కలిపి 11.89 మిలియన్ డాలర్లు ఖర్చు చేశాయి.