Posted: 06/26/2012 09:13 PM IST

అంపైర్ల తప్పుడు నిర్ణయాలకు చెక్ పెట్టేందుకు ఉద్దేశించిన నిర్ణయ సమీక్ష పద్ధతి (డీఆర్ఎస్) తప్పనిస రి చేసేందుకు ఐసీసీ కసరత్తు చేస్తోంది. టెస్టులు, వన్డేల్లో ఈ డీఆర్ఎస్‌ను తప్పనిసరి చేయాలని ఎగ్జిక్యూటివ్ కమిటీ ఐసీసీని కోరుతుంటే.. మొదట్నుంచీ డీఆర్ఎస్‌ను వ్యతిరేకిస్తున్న బీసీసీఐ మాత్రం తన నిర్ణయానికే కట్టుబడి ఉంది. రెండ్రోజులపాటు ఇక్కడ జరిగిన ఐసీసీ సీఈసీ సమావేశాల్లో డీఆర్ఎస్ పనితీరుపై కంప్యూటర్ సాంకేతిక నిపుణుడు ఎడ్ రాస్టెన్ రూపొందించిన నివేదికను కమిటీ పరిశీలించింది. కొత్త హాట్‌స్పాట్ టెక్నాలజీ, బాల్ ట్రాకింగ్ విధానాలపై రాస్టెన్ అందించిన నివేదికపై ఎగ్జిక్యూటివ్ కమిటీ సంతృప్తి వ్యక్తం చేసింది. ఇటీవల ముగిసిన టెస్టు సిరీస్‌లో బాల్ ట్రాకింగ్ విధానం ఖచ్చితత్వంపై రాస్టెన్ పరీక్షించాడని, ఫలితాలు వంద శాతం అనుకూలంగానే వచ్చాయని కమిటీ తెలిపింది. అయితే, మ రో రెండ్రోజుల్లో సమావేశం కానున్న ఐసీసీ బోర్డు డీఆర్ఎస్ పై ఒక నిర్ణయానికి రానుంది. కాగా, గతేడాదే డీఆర్ఎస్‌ను తప్పనిసరి చేయాలని ఐసీసీ భావించగా, బీసీసీఐ ఒత్తిడితో వెనక్కి తగ్గిన సంగతి తెలిసిందే.