సీమాంధ్ర ఉద్యోగులకు షాకిచ్చిన బ్యాంకులు

Posted: 10/21/2013 08:25 PM IST

రాష్ట్ర విభజన ప్రకటన కాంగ్రెస్ హైకమాండ్ చేసిన నాటి నుండి సీమాంద్ర ఉద్యోగులు సమైక్యాంద్ర కోసం సమ్మెలో పాల్గొన్నారు. రెండు నెలల పాటు సమైక్యాంద్ర సమ్మెలో పాల్గొన్న సీమాంద్ర ఉద్యోగులకు .. ప్రభుత్వం జీతాలు కట్ చేసింది. అయితే సీమాంద్ర ఉద్యోగులను ఆదుకోవటానికి కొన్ని బ్యాంకులు ముందుకు వచ్చాయి. కానీ సీమాంధ్రలోని ఉద్యోగులకు ప్రభుత్వ బ్యాంకులు బుణ కటింగులతో ఝలక్‌ ఇచ్చాయి. ఒకచేత్తో ఇచ్చి మరో చేత్తో లాగేసుకున్నాయి. సీమాంధ్రలో సమ్మె కాలంలో జీతాలు రాక ఇబ్బందులు పడుతున్న ఉద్యోగులు ఆదుకుంటామని ముందుకొచ్చిన బ్యాంకులు, ఇప్పుడు చుక్కలు చూపిస్తున్నాయి. ఇచ్చిన హామీ మేరకు అప్పులు ఇస్తున్నా కటింగుల పేరుతో లాగేసుకుంటున్నాయి. దీంతో ఉద్యోగులకు అకౌంట్లో డబ్బులు పడ్డాయన్న ఆనందం లేకుండా పోయింది .సమ్మె కారణంగా జీతం కోల్పొయిన ఉద్యోగులకు యాభై వేల వరకు రుణం ఇస్తామంటూ బ్యాంకులు ఊదరగొట్టాయి.

 

దీంతో ఉద్యోగులు బ్యాంకుల ముందు క్యూ కట్టారు. పత్రాలు ఇచ్చి అప్పు కోసం ఎదురుచూపులు మొదలుపెట్టారు. ఇంతలో రుణం మంజూరు అయ్యిందంటూ బ్యాంకు నుంచి ఓ మెసేజ్‌ రానే వచ్చింది. ఆశగా ఏటీఎంకు పరుగులు తీసిన ఉద్యోగులకు అసలు విషయం తెలిసింది. ఇచ్చిన యాభై వేల రూపాయల్లో ముప్పై వేల రూపాయలకు రెక్కలొచ్చేశాయి. రెండు నెలల వాయిదాలు, అడ్వాన్సులు అంటూ ముప్పై వేల రూపాయలు మినహాయించుకున్నారు బ్యాంకు అధికారులు.

 

దీంతో వారి ఆశలు అడియాసలే అవుతున్నాయి. సమ్మెకాలంలో వచ్చిందే మనదనుకుంటున్నారు. మొత్తానికి రుణం వచ్చిందనే ఆనందం ఉద్యోగులకు లేకుండానే పోయింది. చేసేదేమీ లేక దక్కిన డబ్బులతోనే ఉద్యోగులు సర్దుకుపోతున్నారు.