పాతబస్తీలో కాల్పులు- ఈ అర్థరాత్రి నుంచి సమ్మె

Posted: 09/11/2013 08:18 PM IST

పాతబస్తీలో రియల్ ఎస్టేట్ వ్యాపారిపై జరిగిన కాల్పుల ఘటన కలకలం సృష్టించింది. కరీంముల్లాఖాన్‌ అనే రియల్ ఎస్టేట్ వ్యాపారిపై కాల్పులు జరిగాయి. సమీప బంధువులే అతనిపై కాల్పులు జరిపారు. తనపై ఇర్ఫాన్‌, అహ్మద్‌లు కాల్పులు జరిపారని కరీంముల్లాఖాన్ పోలీసులకు ఫిర్యాదు చేశారు. కాల్పులకు కారణం కుటుంబకలహాలేనని పోలీసులు చెబుతున్నారు.

 

అర్థరాత్రి సమ్మె

సీమాంధ్ర విద్యుత్ సిబ్బంది బుధవారం అర్థరాత్రి నుంచి 72 గంటల సమ్మెకు పిలుపు ఇచ్చారు. సమ్మె వల్ల ప్రజలు ఇబ్బంది పడతారని ముఖ్యమంత్రి నచ్చజెప్పడంతో వారు నిరవధిక సమ్మెను 72 గంటలకు కుదించుకున్నారు. ఆంధ్ర ప్రదేశ్ సమైక్యంగా ఉండాలని కోరుతూ తామూ ఈ సమ్మె చేయనున్నట్టు వారు చెప్పారు. అత్యవసర సేవలను మాత్రం సమ్మె నుంచి మినహాయిస్తున్నట్టు వారు స్పష్టం చేశారు. రాష్ట్రం విడిపోతే జరిగే నష్టం ఏమిటని మీడియా ప్రతినిధులు ప్రశ్నించగా దానివల్ల విద్యుత్ బిల్లులు విపరీతంగా పెరిగిపోతాయని వారు వివరించారు. ఈ సమ్మె వల్ల జరిగే నష్టాల గురించి తమకు తెలుసునని, అయినా రాష్ట్ర సమైక్యతను ఆకాంక్షిస్తూ సమ్మెకు దిగుతున్నామని వారు వివరించారు. రాష్ట్రాన్ని విభజించవద్దు అని కోరుతూ సమ్మెకు వెళ్తున్నట్టు ఎప్పుడో నోటీసు ఇచ్చామని, కాని ఇంతవరకు ప్రత్యామ్నాయ ఏర్పాట్లు చేసుకోలేదని వారు ప్రభుత్వాన్ని విమర్శించారు. అయినా అత్యవసర సేవలను ఈ సమ్మెనుంచి మినహాయిస్తున్నట్టు వారు వెల్లడించారు.