సమైక్యాని ఒకే కానీ.. సీఎం- విభజన పై ఓటింగ్ ఉండదు

Posted: 09/10/2013 08:38 PM IST

ముఖ్యమంత్రి కిరణ్‌కుమార్‌రెడ్డిని ఈరోజు తెలంగాణ మంత్రులు కలుసుకున్నారు. ఏపీ ఎన్జీవోల సమావేశానికి మీరే మద్దతు ఇచ్చారని, సీమాంధ్రకు అనుకూలంగా ఉన్నారని అందరూ అంటున్నారని సీఎంతో తెలంగాణ మంత్రులు అన్నారు. దీనిపై స్పందించిన కిరణ్‌కుమార్‌రెడ్డి మాట్లాడుతూ రాష్ట్రం సమైక్యంగా ఉండాలని కోరుకుంటున్న మాట వాస్తవమేనని, అలాగని సీమాంధ్రకు అనుకూలం కాదని, వారికి మద్దతు ఇవ్వలేదని ఆయన స్పష్టం చేశారు. ఆంద్రప్రదేశ్‌కు ముఖ్యమంత్రిగా ఉన్న తనకు అందరూ సమానమేనని సీఎం కిరణ్ తెలంగాణ మంత్రులతో అన్నారు. ఆనాడు ప్రత్యేక తెలంగాణ కోసం తెలంగాణ వాదులు, నేతలు ఉద్యమాలు చేస్తుంటే మీరు వెళ్లి మద్దతు తెలిపారు కాదా అని తెలంగాణ మంత్రులను ఉద్దేశించి అన్నారు. మీ మనోభావాలను అర్ధం చేసుకున్నాను. అలాగే ఇప్పుడు ఏపీ ఎన్జీవోలు సమైక్యం కోరుతూ సభ పెట్టుకున్నారు. వాళ్ల మనోభావాలను అర్ధం చేసుకున్నానని తెలంగాణ మంత్రులతో సీఎం అన్నారు.

 

ఓటింగ్ ఉండదు : గండ్ర

విభజనపై అసెంబ్లీలో చర్చే తప్ప ఓటింగ్? ఉండదని, ప్రాంతాల వారీ నేతలు అభిప్రాయం వ్యక్తం చేస్తారని, దానికి విప్ జారీ చేయాల్సిన అవసరం ఏముందని ప్రభుత్వ చీఫ్‌విప్ గండ్ర వెంకట రమణారెడ్డి ప్రశ్నించారు. ఆనాటి సమావేశంలోనే సద్భావన సభ నిర్వహణపై తుది నిర్ణయం తీసుకుంటామని వివరించారు. తెలంగాణ రాష్ట్రానికి సానుకూలంగా నిర్ణయం తీసుకున్నందుకు ఏఐసీసీ అధ్యక్షురాలు సోనియాగాంధీపై సీమాంధ్ర నేతలు విమర్శలు గుప్పించడాన్ని గండ్ర తప్పుపట్టారు. రాష్ట్రంలో దాదాపు అన్ని రాజకీయపక్షాలూ తెలంగాణాకు సానుకూలంగా నిర్ణయం తీసుకున్నాకే .. ఆడిన మాటను తప్పని కాంగ్రెస్ దీనిపై ఒక నిర్ణయం తీసుకుందని వివరించారు. రాష్ట్రంలో తెలంగాణ కోసం లేఖలు ఇచ్చిన రాజకీయ పక్షాలు తమ లబ్ది కోసం యూటర్న్ తీసుకున్నా కాంగ్రెస్ అధిష్ఠానం మాత్రం మాటకు కట్టుబడి ఉందన్నారు.