డ్యూటికి దూరమైన చెల్లెమ్మ ? కీలక ఫైళ్లు పెండింగ్ ?

Posted: 04/18/2013 04:37 PM IST

హోం మంత్రి సబిత విధులకు దూరంగా ఉండటంతో కీలక దస్త్రాలు ఆమోదానికి నోచుకోలేక పోతున్నాయి. ఈ దస్త్రాలలో పోలీసు అధికారుల పదోన్నతులతో పాటు ఈ శాఖకు చెందిన అతి ముఖ్యమైన అంశాలు ఉన్నట్లు తెలుస్తోంది. తమ శాఖకు వస్తున్న దస్త్రాలన్నింటినీ సబిత కార్యాలయానికి చెందిన అధికారులు తీసుకుని బీరువాలలో దాచి పెడుతున్నట్లు సమాచారం. ఒకటి రెండు సందర్భాలలో కొన్ని ముఖ్యమైన దస్త్రాలను ఆ అధికారులు ఆమె నివాసానికి తీసుకు వెళ్ళి చూపించే ప్రయత్నం చేసినా అందుకు ఆమె నిరాకరించినట్లు సమాచారం. ముఖ్యమంత్రి కిరణ్‌కుమార్‌రెడ్డి జిల్లాల పర్యటనలో ఉండటంతో ఈ దస్త్రాలపై పెద్దగా దృష్టి సారించలేదని చెబుతున్నారు. 1991 బ్యాచ్‌కు చెందిన సర్కిల్‌ ఇన్‌స్పెక్టర్లు డీఎస్పీగా పదోన్నతి పొందాల్సి ఉంది. ఈ దస్త్రం హోం మంత్రి ఆమోదం పొందాక ఆ శాఖ ముఖ్యకార్యదర్శి శాఖ పదోన్నతుల కమిటీ (డిపిసి) నిర్వహించి తదనుగుణంగా పదోన్నతులకు సంబంధించిన నిర్ణయం తీసుకోవాల్సి ఉంది.

ఈ తరహా ముఖ్యమైన దస్త్రాలు హోం మంత్రి కార్యాలయానికి ఇప్పటికే చేరాయని, ఒకటి రెండు రోజుల్లో మరిన్ని ఫైళ్ళు వచ్చే అవకాశం ఉన్నట్లు పోలీసు ఉన్నతాధికారులు చెబుతున్నారు. జగన్‌ అక్రమాస్తుల కేసులో ప్రత్యేక కోర్టుకు సీబీఐ దాఖలు చేసిన చార్జీషీట్‌లో హోం మంత్రి సబితను ఏ 4గా పేర్కొన్న విషయం తెలిసిందే. సబిత పేరును చార్జీషీట్‌లో చేర్చడంతో కినుక వహించిన ఆమె గత సోమవారం తన మంత్రి పదవికి రాజీనామా చేశారు. సబిత రాజీనామాను ముఖ్యమంత్రి కిరణ్‌కుమార్‌రెడ్డి తిరస్కరించారు. అయినప్పటి సబిత విధులకు దూరంగా ఉంటున్నారు. అధికారిక కార్యక్రమాల్లో కూడా పాల్గొనడం లేదు. మంత్రి సచివాలయానికి రాకపోవడంతో ఆమె చూడాల్సిన దస్త్రాలన్నీ పెండింగ్‌లో పడ్డాయి. వారం రోజులుగా మంత్రి చాంబర్‌కు రాకపోవడంతో కార్యాలయ సిబ్బంది ఆమె నివాసంలోనే విధులకు హాజరవుతున్నారు. దీంతో సచివాలయం జే బ్లాక్‌ 8 వ అంతస్థులో ఉన్న సబిత కార్యాలయం సందర్శకుల లేమితో బోసిపోయింది.