Posted: 03/06/2012 07:12 PM IST

 

ఓ వైపు మండుతున్న ఎండలు.. మరోవైపు జలాశయాల్లో అడుగంటుతున్న నీటి మట్టాలతో గ్రేటర్‌లో నీటి సమస్య తీవ్రం అవుతోంది. రాజధాని ప్రజలకు ప్రధాన నీటి వనరులైన జంట జలాశయాలతో పాటు మంజీరా రిజర్వాయర్‌లో రోజు రోజుకూ నీటి మట్టాలు పడిపోతున్నాయి. దీంతో రాబోయే రోజుల్లో నీటి ఎద్దడి మరింత పెరిగే అవకాశం కనిపిస్తోంది. మరోవైపు మార్చి నెలలోనూ పరిస్థితి ఇలా ఉంటే... మే, జూన్‌లో ఏ విధంగా ఉంటుందోని రాజధాని వాసులు హడలిపోతున్నారు. గ్రేటర్‌లో ఉన్న దాదాపు 75 లక్షల ప్రజలకు ఈ వేసవిలో నీటి కష్టాలు తప్పేట్టుగా లేవు.జంట నగరాలకు నీరందిస్తున్న ఐదు జలాశయాలు ఎండలకు అడుగంటిపోతున్నాయి.

మఖ్యంగా నగరానికి 340 మిలియన్ల నీటిని అందిస్తున్న ఉస్మాన్‌ సాగర్‌...హిమాయత్‌సాగర్‌...అక్కంపల్లి మంజీరా రిజర్వాయర్‌లలో నీటి మట్టాలు పడిపోతున్నాయి. వేసవి ఆరంభంలోనే రిజర్వాయర్లలో నీటిమట్టాలు తగ్గిపోతుండటంతో ఆందోళన వ్యక్తం అవుతోంది. ఇక... ఉస్మాన్‌ సాగర్‌లో కనీస నీటిమట్టం 1790 అడుగులు కాగా.. ప్రస్తుతం 1775.35 అడుగులు మాత్రమే ఉంది. హిమాయత్‌ సాగర్‌లో కూడా నీటి మట్టం కనీస స్థాయిలోనే ఉంది. మరోవైపు.. మంజీరాలో ప్రస్తుతం నీటిమట్టం 1645.400 ఫీట్స్‌ ఉండగా ...గత ఏడాది ఇదే సీజన్‌లో 1648 ఫీట్స్‌ ఉంది. గత ఏడాదితో పోలిస్తే నీటి మట్టం భారీగా తగ్గిపోయింది. దీంతో నీటి కొరతపై నగరవాసులు ఆందోళన చెందుతున్నారు. ఇది ఇలా ఉంటే రిజర్వాయర్లలో నీటి లభ్యత తక్కువగా ఉండటంతో మే వరకు మాత్రమే ఇక్కడి నుంచి నీటిసరఫరా జరిగే పరిస్తితి ఉందని తెలుస్తోంది. ఇక ఆ తరువాత రాజధాని ప్రజలకు నీటి కరువు తప్పదని చెబుతున్నారు. అయితే.. పరిస్థితి రోజు రోజుకూ దారుణంగా తయారౌతున్నా అధికారుల్లో మాత్రం చలనం రావటం లేదని ప్రజలు విమర్శిస్తున్నారు.