Posted: 03/01/2012 06:02 PM IST

బ్లైండ్ డేటింగ్... ఇటీవలి కాలంలో నగరంలోని యువత ఎక్కువగా కలవరిస్తున్న పదం. తెలిసిన వారితోనే స్నేహం చేయడానికి ఇప్పటి వరకు సంశయించిన అమ్మాయిలు కూడా బ్లైండ్ డేట్ అంటూ తెలియని వారితో సైతం రెస్టారెంట్లకు వెళ్ళడానికి, బాధలు పంచుకోవడానికి మక్కువ చూపుతున్నారు.

నిన్న మొన్నటి వరకు విదేశాల్లో మాత్రమే ఎక్కువగా కనిపించిన బ్లైండ్ డేటింగ్ ట్రెండ్ ఇప్పుడు నగరంలోనూ కనిపిస్తోంది. రెగ్యులర్ డేటింగ్ లకు భిన్నంగా ఉండటం... తమ వ్యక్తిగత సమాచారం షేర్ చేసుకోవాల్సిన అవసరం లేకపోవడం... కొత్త పరిచయాలు కలుగుతాయన్న ఆశ.... తదితర కారణాల వల్ల ఎక్కువ మంది ఇటువైపు చూస్తున్నారని తెలుస్తుంది.

బ్లైండ్ డేటింగ్ అంటే ఇదేనా... ?

అరేంజ్డ్ మ్యారేజ్... బ్లైండ్ డేట్ ఒకటే అని అంటున్నారు. ఇప్పటికే ఈ డేట్స్ రుచి మరిగిన కొందరు. అరేంజ్డ్ మ్యారేజ్ లో వివాహం, బంధం అనే కీలకమైన అంశాలను ప్రక్కన పెడితే.... సంబంధం కుదుర్చుకోవడం జరుగుతుంది. బ్లైండ్ డేట్స్ లో ఆ పనిని వెబ్ సైట్లు చేస్తాయి అని అంటున్నారు.

వినోదం + పరిచయాలు = ?

బ్లైండ్ డేట్స్ వల్ల ఎక్కువ మందితో పరిచయాలు కలుగటంతో పాటుగా మానసిక ఆనందం కూడా పొందవచ్చు అని అంటున్నారు.  డేట్స్ అంటే ఉదయం లేవడటం... సరదాగా కాసేపు ఏదైనా రెస్టారెంట్ లో గడపటం... సినిమాకు వెళ్ళటం... సాయంత్రం బైక్ పై అలా అలా నాలుగు రౌండ్లు తిరగటం... అంతకన్నా ఏమీ ఉండదని చెబుతున్నారు.

జాగ్రత్తలు తీసుకోవాల్సిందే....

ఒంటరితనం వేధించటం... ‘కిక్’ కావాలనుకోవటం.. కొత్త పరిచయాలు... ఏదైతేనేం బ్లైండ్ డేట్ పట్ల ఇటీవలి కాలంలో ఎక్కువ మంది ఆసక్తి కనబరుస్తున్నారు. కానీ... తగిన జాగ్రత్తలు తీసుకోవాల్సిన అవసరం ఉంది. తెలిసిన వారితో బయటకు వెళ్ళటం అంటే అవతలి వ్యక్తి ఎలాంటి  వాడు.. గుణగణాలు కాస్తైనా తెలిసిన అవకాశం ఉంది. ఇదే ఈ బ్లైండ్ డేట్ లోఆ ఛాన్స్ లేనే లేదు. అందుకే పబ్లిక్ ఎక్కువగా ఉండే సినిమా థియేటర్లకు, పార్క్ లు, రెస్టారెంట్లకు వెళ్ళటం శ్రేయస్కరమని అంటున్నారు. ఇప్పటికే డేట్ చేసిన కొంత మంది అవతలి వ్యక్తి కూడా సరదాగా గడిపే వ్యక్తి అయితే మీరు ఫుల్ గా ఎంజాయ్ చేయవచ్చు. కానీ.... మూడీ పర్సన్ అయితే మాత్రం ఎప్పుడు వదిలించుకుందామా అని ఎదురు చూడాల్సిందే అని అంటున్నారు. అంతేకాదు.. మీ వ్యక్తిగత సమాచారం... ఫోన్ నెంబర్ల లాంటివి ఎట్టి పరిస్థితుల్లోనూ వారికి ఇవ్వక పోవడటం నూరుశాతం శ్రేయస్కరమని అంటున్నారు.