ఒకే వేదికపై మూడు భాషల బాహుబలి

Posted: 04/06/2015 11:58 AM IST

దర్శకుడు రాజమౌళి దర్శకత్వంలో ప్రతిష్టాత్మకంగా తెరకెక్కుతున్న చిత్రం ‘బాహుబలి’. ప్రభాస్, రానా, అనుష్క, తమన్నా ప్రధాన పాత్రలలో నటిస్తున్న ఈ చిత్రంపై ఇప్పటికే సౌత్ ఇండియాలో భారీ అంచనాలు నెలకొన్న విషయం తెలిసిందే. ఈ సినిమా విడుదల కోసం సినీ అభిమానులు ఎంతగానో ఎదురుచూస్తున్నారు.

భారీ బడ్జెట్ తో, అత్యాధునిక సాంకేతిక నిపుణులతో రూపొందుతున్న ఈ చిత్రానికి యం.యం.కీరవాణి సంగీతం అందిస్తున్నారు. రెండు భాగాలుగా రూపొందుతున్న ఈ చిత్రంలోని మొదటి భాగాన్ని మే 15న ప్రపంచ వ్యాప్తంగా విడుదల చేయబోతున్నట్లు దర్శకుడు రాజమౌళి ప్రకటించారు.

అయితే విడుదల సమయం దగ్గరపడుతుండటంతో ఈ చిత్ర ఆడియోను విడుదల చేసేందుకు చిత్ర యూనిట్ సన్నాహాలు చేస్తున్నారు. ఈ చిత్ర ఆడియో విడుదల కార్యక్రమాన్ని వినూత్న రీతిలో ఏర్పాటు చేయాలని ‘బాహుబలి’ చిత్ర యూనిట్ ప్రయత్నిస్తున్నారు. తెలుగుతో పాటు తమిళ, హిందీ భాషలలో ఈ చిత్రాన్ని ఏకకాలంలో విడుదల చేయనున్నట్లుగా తెలిసింది.

ఇందుకోసం ఈ మూడు భాషలలోని ‘బాహుబలి’ ఆడియో విడుదల కార్యక్రమాన్ని మూడు వేడుకలపై ఘనంగా జరుపనున్నారని టాక్ వినిపించింది. కానీ తాజా సమాచారం ప్రకారం... ఈ మూడు భాషల ఆడియోలను కూడా ఒకే వేదికపై.. ఈ మూడు భాషలకు సంబంధించిన స్టార్ హీరోల సమక్షంలో ఆడియో విడుదల కార్యక్రమం జరుపనున్నట్లుగా సమాచారం. త్వరలోనే ఈ విషయంపై చిత్ర యూనిట్ ఓ అధికారిక ప్రకటన విడుదల చేయనుంది.