ఆవులకు ఆధార్.. లాజిక్ ఉందా?

Posted: 04/25/2017 09:19 AM IST

ఆధార్ తప్పనిసరి కాదంటూనే ప్రతీ దానికి దాన్ని ముడిపెట్టడం, సర్కార్ పై సుప్రీం కోర్టు సీరియస్ అవ్వటం చూశాం. అయితే వ్యక్తి గుర్తింపు కోసం కావాల్సిందేనంటూ ప్రభుత్వం వాదిస్తోంది. ఈ దశలో ఆవులకు ఆధార్ కార్డు అన్న అంశం ఆ మధ్య చర్చనీయాంశంగా మారింది.

అయితే ఇంతకాలం కేవలం ఆవులను గుర్తించేందుకు పని కొస్తుందని చెబుతూ వస్తున్న కేంద్రం ఇప్పుడు మరో వాదనను దానికి కలుపుతోంది. ఈ మధ్య గో రక్షక దళాల దాడులు మరీ ఎక్కువ అయిపోయాయి. వాటిని అక్రమ రవాణా చేయటం, దొరికిన వారిపై దాడులు ఎక్కువ అయిపోయాయి. అందుకే ఆధార్ ఉంటే ఈ సమస్యలు తలెత్తవని హోం మంత్రిత్వ శాఖ ఏర్పాటు చేసిన కమిటీ అభిప్రాయం వ్యక్తం చేసింది.

యూఐడీ నంబర్ ఉంటే వయసు, జాతి, సెక్స్, ఎత్తు, శరీరం, రంగు, ఇలా ఆ జంతువుకు సంబంధించిన వివరాలను ఆధార్ లో నమోదు పరుస్తామని కమిటీ తెలిపింది. అయితే వాటి సంరక్షణ బాధ్యతలను చూసుకోవాల్సింది మాత్రం రాష్ట్ర ప్రభుత్వమేనని సూచించింది. అంతేకాదు అఖిల భారత గోసేవ సంఘం కూడా ఈ మేరకు సుప్రీంకోర్టులో ఓ పిటిషన్ కూడా దాఖలు చేసింది. దీనిపై నేడో, రేపో విచారణ జరగనుంది.

రాజస్థాన్ లో ఓ పెహ్లూ ఖాన్ అనే ఓ డెయిరీ ఓనర్ ను అనుమతితోనే గో రవాణా చేసినప్పటికీ కొందరు దాడి చేసి చంపటం తెలిసిందే. దీనిపై వామపక్షాలు కూడా గో రక్షక దాళాల పేరుతో జరిగే హింసను అడ్డుకోవాలని ప్రభుత్వాన్ని కోరుతున్నాయి.