2019లో అనంత నుంచి పవన్ పోటీ..

Posted: 11/10/2016 04:46 PM IST

అనంతపురం అంటే అమితమైన ఇష్టం ప్రమే అని చెప్పిన జనసేన అధినేత పవన్ కల్యాన్ రాష్ట్రంలో తొలిసారిగా తన తొలి కార్యాలయాన్ని అనంతపురం జిల్లాలోనే ప్రారంభిస్తున్నట్లు జనసేన అధినేత, పవర్ స్టార్ పవన్ కల్యాణ్ ప్రకటించారు. దీంతో పార్టీ శ్రేణులు, అభిమానులు కేరింతలు కోడుతుండగానే వారి కరతాళ ధ్వనుల మధ్యే తాను అనంతపురం నుంచి పోటీ చేస్తానని పవన్ కల్యాణ్ ప్రకటించారు.

తాను వెనుకబడిన జిల్లా నుంచి ప్రాతినిధ్యం వహించేందుకు సిద్దమని చెప్పారు. గెలుస్తానో లేదో అది తరువాత చూద్దమన్నారు. ‘‘నేను మీ కోసం పోరాడుతున్నాను.. అందుకనే ఇక్కడి నుంచి పోటీకి సిద్దమయ్యాను.. జిల్లాలో వేళ్లూనుకున్న కరువు ఇక్కడి నుంచి.. ఎందుకు తరమలేమో చూద్దాం.. మీరు నాకు అండ‌గా ఉన్నా లేక‌పోయినా నేను మీకు అండ‌గా ఉంటాను’’ అని ప‌వ‌న్ అన్నారు.

‘ఏ ప్రాంతంలో ఏ కులంలో పుట్టానో నేను ప‌ట్టించుకోను. కులాలు, మ‌తాల‌కు అతీతంగా నేను పోరాటం చేస్తానన్నారు. అనంతపురం జిల్లాలో కరువుకు రెండు కారణాలని ఆయన చెప్పారు. ఒకటి ప్రకృతి శాపం వల్ల జరిగితే రెండవ కారణం మన నాయకులేనని అయన చెప్పారు. మన ప్రాంతంలో పుట్టి మనకు న్యాయం చేయలేని రాజకీయ నాయకులు అనంతపురం జిల్లా పాలిట కరువుకు కారణమయ్యారని మండిపడ్డారు.