శబరి గుళ్లోకి ఆడాళ్ల ప్రవేశంకు గ్రీన్ సిగ్నల్

Posted: 11/07/2016 03:22 PM IST

కేరళ లోని ప్రముఖ పుణ్యక్షేత్రం శబరిమలైలోకి మహిళల ప్రవేశానికి ప్రభుత్వం గ్రీన్ సిగ్నల్ ఇచ్చింది. ఈ మేరకు అయ్యప్ప స్వామి గర్భగుడిలోకి మహిళలు ప్రవేశించవచ్చంటూ ప్రభుత్వం సుప్రీం కోర్టుకు తెలిపింది.

గత కొన్ని శతాబ్దాలుగా 10 నుంచి 50 ఏళ్ళ లోపు మహిళలు గుళ్లోకి ప్రవేశించేందుకు అనుమతించలేదు. ముఖ్యంగా రుతుస్రావం సమస్య కారణంగా ఆలయం అపవిత్రమైపోతుందన్న కారణంగానే ఈ ఆనవాయితీ ఉందన్న వాదన ఓవైపు, స్వామి బ్రహ్మచారి కాబట్టే ఆడాళ్లకు ప్రవేశం లేదన్న మరో వాదన గట్టిగా వినిపించాయి. 2007 లో లెఫ్ట్-యూడీఎఫ్ ప్రభుత్వం అందుకు అభ్యంతరం చెప్పకపోగా, తర్వాత ఏర్పడిన కాంగ్రెస్-యూడీఎఫ్ ప్రభుత్వం అందుకు నిరాకరించింది.

అయితే ఇది ముమ్మాటికీ హక్కుల ఉల్లంఘనే అవుతుందని సుప్రీం ఈ ఫిబ్రవరిలో స్పష్టం చేయటంతో, మళ్లీ అధికారంలోకి వచ్చి యూడీఎఫ్ ఆ నిబంధనను సవరిస్తూ మహిళలకు గర్భగుళ్లోకి నిరభ్యరంతంగా ప్రవేశించవచ్చని ఓ ప్రకటనలో తెలిపింది.

కాగా, గత కొన్నేళ్లుగా శబరిమల గుడిలోకి మహిళలను అనుమతించాలని కోరుతూ మహిళా సంఘాలు ఆందోళన జరుగుతున్న విషయం తెలిసిందే. కేరళ ప్రభుత్వం తాజా ప్రకటనతో మహిళా సంఘాలు హర్షం వ్యక్తం చేస్తున్నాయి. అయితే ఆలయ ట్రస్ట్ బోర్డు మాత్రం ఈ నిర్ణయాన్ని వ్యతిరేకిస్తోంది. గతేడాది బోర్డు చీఫ్ గోపాలకృష్ణన్ రుతుసమస్యలను గుర్తించే యంత్రం కనిపెట్టిన తర్వాతే మహిళలను లోపలికి అనుమతించాలంటూ వ్యాఖ్యలు చేసి తీవ్ర దుమారం రేపాడు. ఇక తాజా నిర్ణయంతో బోర్డు ఎలాంటి చర్యలకు దిగబోతుందోనని సర్వత్రా ఆసక్తి నెలకొంది.