ఆ రెండు థియేటర్లకు ఎమ్మెల్యే నుంచి పెనుముప్పు

Posted: 10/19/2016 07:32 AM IST

నగర బీజేపీ ఎమ్మెల్యే రాజాసింగ్ అబిడ్స్ లోని రెండు థియేటర్లకు సాలిడ్ వార్నింగ్ ఇచ్చాడు. హిందీ సినిమాలు ఎక్కువగా ప్రదర్శించే సంతోష్, స్వప్న థియేటర్ల యాజమాన్యాలను హెచ్చరిస్తూ ఓ లేఖ రాశాడు. కరణ్ జోహర్ దర్శకత్వంలో వస్తున్న 'ఏ దిల్ హై ముష్కిల్' సినిమాను ఆ రెండింటిలో ప్రదర్శిస్తే మాత్రం తీవ్ర పరిణామాలు ఎదుర్కొవాల్సి వస్తుందని హెచ్చరించాడు. తన హెచ్చరికలు బేఖాతరు చేస్తూ సినిమాను ప్రదర్శిస్తే మాత్రం తాను కేజ్రీవాల్ లా ధర్నా చేసేవాడిని కాదని అందులో పేర్కొన్నాడు. అవసరమైతే పెట్రోల్ తీసుకెళ్లి ధియేటర్ ను కాల్చేస్తానని తెలిపాడు.

ఇంతకీ ఆయన వాదన ఏంటంటే... కరణ్ జోహార్ పెద్ద ప్రొడ్యూసర్.. ఈ సినిమా విడుదల కాకపోవడం వల్ల వచ్చే నష్టం ఏమీ లేదు. కానీ, కరణ్ ఇచ్చిన రెమ్యూనరేషన్ తో పాక్ నటుడు ఫవాద్ ఖాన్ తన సొంత దేశం పాకిస్థాన్ వెళ్లి ట్యాక్సులు కడతాడు. అది గవర్నమెంట్ కి చేరి, దానిని వారు ఐఎస్ఐ ఉగ్రవాదులకు ఇస్తారు. వాళ్లు బాంబులు, తుపాకులు తయారుచేసి తీవ్రవాదులకు అందిస్తారు. వాళ్లు వాటితో మన సైనికులను హతమార్చుతారని అన్నారు. అంటే మన డబ్బుతో మనల్నే అంతం చేస్తారని ఆయన అంటున్నాడు. అలా జరగకూడదనే తన ప్రయత్నం తాను చేస్తున్నానని ఆయన తెలిపారు.

ఇక తన నియోజకవర్గంలో ఓ పాకిస్థాన్ నటుడి సినిమాను ప్రదర్శించడాన్ని తాను ఎట్టి పరిస్థితుల్లో అంగీకరించబోనని చెప్పిన రాజాసింగ్, సినిమా విడుదలైతే థియేటర్లను నాశనం చేస్తానని హెచ్చరించాడు. మరోవైపు చైనా టపాసులు కొనుగోలు చేయొద్దంటూ ప్రజలకు విజ్నప్తి చేస్తున్నాడు. ఆ డబ్బును చైనా భారత్ కు వ్యతిరేకంగా పాకిస్థాన్ లో కారిడార్లు కట్టేందుకు, పాక్ తీవ్రవాదులకు సాయం చేసేందుకు వినియోగిస్తోందని చెబుతున్నారు. బహుశా ఇంతవరకు ఏ ప్రతినిధి కూడా ఇంతలా ఆలోచన చేయలేదేమో.