మల్లన్న మ్యాటర్ లో ఈ చక్రం తిప్పుడేందీ?

Posted: 08/01/2016 08:03 AM IST

పెను వివాదంగా మారిన మల్లన్నసాగర్ ప్రాజెక్టు భూసేకరణ అంశం పూర్తిగా తెరమరుగు కానుంది. ప్రతిపక్షాలు, విపక్షాలు, ప్రజా సంఘాలు ఎన్ని కలిసి నానారాద్ధాంతం చేసినా సరే ఇరిగేషన్ మంత్రి హరీష్ రావు వ్యూహం ముందు అవేమీ నిలబడలేకపోతున్నాయి. గత కొన్ని రోజులుగా అటు రైతుల నుంచే కాకుండా ఇటు రాజకీయంగా కూడా దీనిపై భారీ వ్యతిరేకత వ్యక్తమవుతున్న సంగతి తెలిసిందే. నిపుణులు వద్దని వారిస్తున్న సరే మొండిపట్టుతో టీ సర్కార్ ముందుకు వెళ్తున్నాడని వారు ఆరోపిస్తున్నారు.

అయితే ప్రభుత్వం, ముఖ్యంగా సీఎం కేసీఆర్ ప్రతిష్ఠాత్మకంగా భావిస్తున్న ప్రాజెక్టు కావటంతో జపాన్ పర్యటనను రద్దు చేసుకుని మరీ హరీశ్ రావు నేరుగా కార్యరంగంలోకి దిగిపోయారు. ఈ క్రమంలో మల్లన్నసాగర్ ప్రాజెక్టు పరిధిలోకి వచ్చే గ్రామాల్లో ఆయన అడుగుపెట్టారు. స్వయంగా గ్రామాలకు వచ్చి ప్రాజెక్టు ఆవశ్యకత, భూములిస్తే దక్కనున్న లబ్ధిపై హరీశ్ వివరించడంతో రైతులు ఆందోళన బాటను విడనాడారు. ఇప్పటికే భూసేకరణకు మెజారిటీ గ్రామాల రైతులను ఒప్పించగలిగిన ఆయన నిన్న సింగారం గ్రామంలోనూ సానుకూల ఫలితాలను సాధించారు.

మీడియా సహకారంతో అనుమానాలను నివృత్తి చేయటంతోపాటు, ప్రతిపక్షాలు హైలెట్ చేసిన గ్రామాల్లోనే ప్రాజెక్టు కోసం భూములిచ్చేందుకు స్వచ్ఛందంగా ముందుకు వచ్చేలా కృషి చేశారు. ఒక్క వేములఘాట్ గ్రామ రైతులు మాత్రమే ఈ విషయంలో కాస్త వ్యతిరేకత చూపిస్తున్నప్పటికీ ఈ రెండు మూడు రోజుల్లో వారితోనూ కూడా హారీష్ రావు భేటీ అయ్యేందుకు సిద్ధమౌతున్నారు. ఈ వ్యవహారంలో ఆయన స్థానంలో వేరోకరు ఉండి ఉంటే సమస్య ఇంత తేలిగ్గా పరిష్కారం అయి ఉండేది కాదన్నది వాదన వినిపిస్తోంది. మొత్తానికి రాజకీయ ప్రకంపనలు పుట్టించిన మల్లన్నసాగర్ నిర్వాసితుల మ్యాటర్ రోజుల వ్యవధిలోనే తెర మరుగు కానుంది.