పార్లమెంట్ లో టియర్ గ్యాస్, పెప్పర్ స్ప్రే

Posted: 11/18/2015 08:08 AM IST

పార్లమెంట్ లో భీభత్సాన్ని సృష్టించడం చూశాం.. పార్లమెంట్ లో సభ్యులు ఒకరినొకరు పిడిగుద్దులు గుద్దుతున్న వార్తలను చూశాం. ఇక తాజాగా పార్లమెంట్ భవనాన్ని అదేదో యుద్దం చేసే ప్రాంతంలా తయారు చేశారు గౌరవనీయ పార్లమెంట్ సభ్యులు.  కొసావో దేశ పార్లమెంట్ సమావేశాలు రణరంగాన్ని తలపిస్తున్నాయి. అధికారపక్షం తీసుకున్న నిర్ణయాలను రద్దు చేయాలని డిమాండ్ చేస్తూ ప్రతిపక్షం సమావేశాలను అడుగడుగునా అడ్డుకుంటుంది. సెర్బ్ కమ్యూనిటీలకు ఎక్కువ అధికారాలు ఇవ్వడం. అదేవిధంగా మాంటీనిగ్రోతో చేసుకున్న సరిహద్దు ఒప్పందాలను రద్దు చెయ్యాలని ప్రతిపక్షం డిమాండ్ చేస్తోంది.

గడిచిన రెండు నెలలుగా పార్లమెంట్ సమావేశాల పనితీరు ఈ విధంగానే నడుస్తోంది. ఈ క్రమంలో భాగంగా నేడు తలపెట్టిన నిరసనలో ప్రతిపక్ష పార్టీ సభ్యులు పార్లమెంట్‌లో టియర్ గ్యాస్‌ను, పెప్పర్ స్ప్రేను ప్రయోగించారు. పోలీసులపై రాళ్లతో దాడి చేశారు. ప్రతిపక్ష నేత అల్‌బిన్ కుర్తి మంత్రులపై పెప్పర్ స్ప్రేను చల్లాడు. పార్లమెంట్ ప్రధాన హాలును బలవంతంగా ఖాళీ చేయించాడు. పార్లమెంట్ వెలుపల పహారా కాస్తున్న పోలీసు సిబ్బంది సైతం తమపై జరుగుతున్న రాళ్లదాడిని అడ్డుకునేందుకు టియర్ గ్యాస్‌ను ప్రయోగించింది. యూరోప్‌లోని కొసావో 2008లో సెర్బియా నుంచి విడిపోయి స్వాతంత్య్రం పొందింది. కాగా కొసావో సార్వభౌమత్వాన్ని సెర్బియా అంగీకరించటం లేదు.