అవినీతిని బయటపెట్టిన జర్నలిస్టు ‘కొంప కొల్లేరు’

Posted: 08/06/2015 10:45 AM IST

Journalist ashok pandey building demolish for revealing mafia scam

అవినీతి జరుగుతున్న చోట న్యాయానికి చోటు లేదని పెద్దలు అంటుంటారు. అవును.. ఈ మాటలు నూటికినూరు శాతం నిజమని ప్రతిఒక్కరు ఒప్పుకోక తప్పదు. ఇందుకు నిదర్శనంగా ఇదివరకే ఎన్నో ఘటనలు చోటు చేసుకోగా.. తాజాగా మరో ఉదంతం వెలుగులోకి వచ్చింది. తన కళ్లముందు జరుగుతున్న అవినీతిని ఎండగట్టేందుకు యత్నించిన ఓ జర్నలిస్టు కొంప కొల్లేరయ్యింది. ఓ భారతీయ పౌరుడిగా సక్రమంగా తన కర్తవ్యాన్ని నిర్వర్తించిన ఆ విలేకరికి చేదు అనుభవమే మిగిలింది. అతడు చేసిన సాహసానికి మెచ్చుకోవాల్సిన ప్రభుత్వమే అతనికి బజారులోకి ఈడ్చుకొచ్చింది.

పూర్తి వివరాల్లోకి వెళ్తే.. ఉత్తరాఖండ్ లో విలేకరిగా పనిచేస్తున్న అశోక్ పాండే ఇన్వెస్టిగేటివ్ జర్నలిస్టుగా ప్రసిద్ధి చెందారు. ఇటీవల ఆ రాష్ట్ర ముఖ్యమంత్రి హరీశ్ రావత్ మాజీ వ్యక్తిగత కార్యదర్శి మహమ్మద్ షాహిద్ లిక్కర్ మాఫియాకు చెందిన కొంతమంది వ్యాపారులతో మద్యం లైసెన్సుల గురించి బేరసారాలు సాగించారు. ఈ విషయం ముందుగానే తెలుసుకున్న అశోక్ పాండే.. వారిమధ్య జరుగుతున్న ‘అవినీతి’ బేరసారాలను బట్టబయలు చేయాలని నిర్ణయించారు. ఆయన అనుకున్నట్లుగా ‘స్టింగ్ ఆపరేషన్’ చేసి మరీ ఈ తతంగాన్ని రికార్డు చేశారు. అంతేకాదు.. సదరు భాగోతాన్ని బట్టబయలు చేశారు. అంతే! ఇక అప్పటినుంచి ఆ జర్నలిస్టుకు కష్టాలు మొదలయ్యాయి.

అప్పటిదాకా అన్నీ సవ్యంగానే ఉన్న అశోక్ పాండే ఇంటిని ఆ తర్వాత నిబంధనలకు విరుద్ధంగా నిర్మించినట్లు ప్రభుత్వం గుర్తించింది. వెంటనే ముస్సోరి-డెహ్రాడూన్ డెవలప్ మెంట్ అథారిటీ(ఎంఎండీఏ)కి చర్యలు తీసుకోవాలని స్పష్టమైన ఆదేశాలు జారీ చేసింది. దీంతో రంగంలోకి దిగిన ఎంఎండీఏ మంగళవారం అశోక్ పాండే ఇంటిలోని కొంత భాగాన్ని కూల్చేసింది. దీంతో ఆ విలేకరి తీవ్ర మనోవేదనకు గురయ్యారు.