ఆ ఉద్యోగి ‘లంచం’ ఉచ్చులో ఏపీ మంత్రి పీ‘తల’

Posted: 06/10/2015 10:15 AM IST

ఏపీ మంత్రి పీతలకు కాలం అంతగా కలిసి రావడం లేదనిపిస్తోంది. ఇటీవలే ఆమె ఇంట్లో నోట్లమూట కనిపించిన వ్యవహారం రాష్ట్రవ్యాప్తంగా సంచలనం రేపగా.. తాజాగా ఈమె మరో వివాదంలో చిక్కుకుంది. ఓ మహిళా ఉద్యోగి తీసుకున్న ‘లంచం’ ఉచ్చులో పీతల హస్తమున్నట్లు స్వయంగా ఆ ఉద్యోగియే వెల్లడించడం తీవ్ర కలకలం రేపింది. దీంతో మంత్రి పీతల తీవ్ర ఆందోళనల్లో మునిగిపోయినట్లు తెలుస్తోంది.

వివరాల్లోకి వెళ్తే.. కృష్ణా జిల్లా మహిళా-శిశు సంక్షేమ కార్యాలయం సీనియర్ అసిస్టెంట్ ఉండ్రాజవరపు జెస్సీ డైమండ్ రోసీ సోమవారంనాడు సెక్యూరిటీ డిపాజిట్ సొమ్ము తిరిగి ఇచ్చేందుకు రూ. 15 వేలు లంచం తీసుకుంటూ ఏసీబీ అధికారులకు పట్టుబడింది. ఈ విషయంపై ఆమెను విచారించగా.. తాను ఆ లంచం తన కోసం కాదని, మంత్రి పీతల, ఆమె కుటుంబసభ్యుల ఖర్చుల కోసం వసూలు చేస్తున్నానంటూ చెప్పినట్లు సమాచారం.

పైగా మంత్రి కోసం ఎప్పుడు ఎంత ఖర్చు పెట్టాననే వివరాలు నమోదు చేసిన ఒక డైరీని ఏసీబీ అధికారులకు చూపించినట్లు తెలిసింది. మంత్రి ఖర్చుల వివరాల డైరీని స్వాధీనం చేసుకుని, ఈ విషయాన్ని హైదరాబాద్‌లోని ఉన్నతాధికారులకు తెలియజేశారు. వారి నుంచి వచ్చిన ఆదేశాల మేరకు దర్యాప్తు అంశాలను గోప్యంగా వుంచినట్లు తెలుస్తోంది. ఆ మహిళా ఉద్యోగిని చెప్పేది నిజమైతే.. మంత్రి పీతల ఎన్నో ఇబ్బందులను ఎదుర్కోక తప్పదు.