కేసీఆర్ లాంటి సీఎంను చూడలేదా.?

Posted: 06/08/2015 03:32 PM IST

Tdp senior leader mothkupalli narsimlu attacked on telangana cm kcr

ఓటుకు నోటు వ్యవహారం సినిమాల్లో లాగా ట్విస్టుల మీద ట్విస్టులు తిరుగుతోంది. రేవంత్ రెడ్డితో మొదలైన ఓటుకు నోటు వ్యవహారం ప్రస్తుతానికి తెలుగుదేశం పార్టీ అధినేత, నారా చంద్రబాబు నాయుడు వరకు వచ్చేసింది. తాజాగా చంద్రబాబు నాయుడు మాట్లాడినట్లుగా వస్తున్న ఆడియో టేపుల మీద తెలుగుదేశం పార్టీ వర్గాలు మండిపడుతున్నాయి. తెలుగుదేశం పార్టీకి నష్టం కలిగించాలనే ఉద్దేశంతో తెలంగాణ ప్రభుత్వం కావాలనే ఆడియో టేపులను విడుదల చేస్తోందని.. తెలుగుదేశం పార్టీ ప్రతిష్టను దిగజార్చాలని చూస్తోందని తెలుగుదేశం తమ్ముళ్లు ఆవేదన వ్యక్తం చేస్తున్నారు.

తెలంగాణ సీఎం కేసీఆర్ పై టీడీపీ నేత మోత్కుపల్లి నర్సింహులు ఫైర్ అయ్యారు. తన 30ఏళ్ల రాజకీయ జీవితంలో కేసీఆర్ లాంటి సీఎంను చూడలేదని ధ్వజమెత్తారు. బెదిరించి, ప్రలోభపెట్టి మరీ కేసీఆర్ తమ ఎమ్మెల్యేలను.. టీఆర్ ఎస్ లో బలవంతంగా చేర్చుకుంటున్నారని మోత్కుపల్లి ఆరోపించారు. నిధులు రాకుండా చేయడం, బిల్లులు ఆపేయడం వంటి పనులతో టీడీపీ ఎమ్మెల్యేలను కేసీఆర్ వేధింపులకు గురి చేస్తున్నారని ఆయన ఆరోపించారు. ఓటుకు నోటు కేసుకు సంబంధించి మాట్లాడిన మోత్కుపల్లి.. ఒక రాష్ట్ర సీఎం ఫోన్ ను ట్యాప్ చేయడం దారుణం అని మండిపడ్డారు. మరీ ఇంతగా దిగజారిన సీఎంను తాను చూడలేదన్నారు. మోసాలకు మారుపేరు కేసీఆర్ అని విమర్శించారు. ఎన్ని కుట్రలు పన్నినా టీడీపీని, చంద్రబాబును ఎవరూ ఏమీ చేయలేరన్నారు. మరోవైపు ప్రొ.జయశంకర్ చరిత్రను పాఠ్యాంశాల్లో ఎందుకు చేర్చలేదో చెప్పాలని ప్రభుత్వాన్ని డిమాండ్ చేశారు. తాము అధికారంలోకి వస్తే పాఠ్య పుస్తకాల్లోంచి కేసీఆర్ చరిత్రను తొలగిస్తామన్నారు.

*అభినవచారి*