Posted: 09/17/2012 03:18 PM IST

 ఒకే ట్రాక్‌పై వచ్చిన రెండు రైళ్లు ఢీకొన్న ఘటన పాకిస్థాన్‌లో చోటుచేసుకుంది. ఈ ప్రమాదంలో ఇద్దరు మరణించగా, సుమారు వందమంది వరకూ గాయపడ్డారు. ఈరోజు తెల్లవారుజామున ఈ ప్రమాదం సంభవించింది. లాహోర్ నుంచి షాలీమార్ ఎక్స్‌ప్రెస్‌, ఫైసలాబాద్‌ నుంచి మిల్లత్ ఎక్స్‌ప్రెస్‌లు కరాచీకి బయల్దేరాయి. అయితే సాంకేతిక కారణాలతో సిగ్నల్‌ పనిచేయకపోవటంతో రెండు రైళ్లు ఒకేసారి ఒకే పట్టాలపైకి దూసుకురావడంతో ఈ ప్రమాదం జరిగింది. ఈ దుర్ఘటనలో షాలీమార్ ఎక్స్‑ప్రెస్ ఇంజిన్‌ పూర్తిగా దెబ్బతినగా డ్రైవర్ అక్కడికక్కడే మృతిచెందాడు. క్షతగాత్రులను కరాచీలోని జిన్నా ఆస్పత్రికి తరలించారు. కొందరు ప్రయాణికులు బోగీల్లో ఇరుక్కుపోవటంతో వారిని సహాయక సిబ్బంది బయటకు తీస్తున్నారు. సహాయక చర్యలు ముమ్మరంగా కొనసాగుతున్నాయి.