Posted: 07/04/2012 11:15 AM IST

రాష్ట్ర వ్యాప్తంగా ఒకే రకమైన ఉద్యమాలు నిర్వహించే టిడిపి ఇప్పుడు తన ఉద్యమ పంథాను మార్చింది. రైతులకు సంబంధించి ఒక్కో ప్రాంతంలో ఒక్కో విధమైన సమస్య ఉన్నందున ఆయా ప్రాంతాల్లో ఆ సమస్యకు ప్రాధాన్యత ఇస్తూ ఉద్యమాలు నిర్వహించాలని నిర్ణయించారు. ఎన్టీఆర్ భవన్‌లో టిడిపి, సిపిఐతో పాటు వివిధ రైతు సంఘాల నాయకుల సమావేశం జరిగింది. ఈ సమావేశంలో రైతుల కోసం భవిష్యత్తులో చేయాల్సిన ఉద్యమాలపై చర్చించారు. రాయలసీమలో రైతులకు రుణాలు లభించక ఇబ్బందులు పడుతున్నారని, రాయలసీమలోని బ్యాంకులను సందర్శించి పంట రుణాలు, ఇన్‌పుట్ సబ్సిడీ, కౌలు రైతులకు రుణాల చెల్లింపుపై ఉద్యమించాలని నిర్ణయించారు.

కోస్తా జిల్లాల్లో పంటలకు గిట్టుబాటు ధర లభించకపోవడం ప్రధాన సమస్యగా ఉన్నందున గిట్టుబాటు ధర కోసం ఆ జిల్లాల్లో ఆందోళనలు జరుపుతారు. తెలంగాణ జిల్లాల్లో విత్తనాలు, ఎరువుల కొరత ఎక్కువగా ఉందని, ఈ సమస్యపై ఉద్యమిస్తామని తెలిపారు. సమావేశం వివరాలను టిడిపి నాయకులు కోడెల శివప్రసాదరావు, సిపిఐ రైతు నాయకులు రామకృష్ణ మీడియాకు వివరించారు. విత్తనాలు లభించక, రుణాలు అందక, బ్లాక్ మార్కెట్‌లో ఎరువులు కొనలేక రైతులు దిక్కుతోచని స్థితిలో ఉన్నారని తెలిపారు. రైతుకు వ్యవసాయం అంటేనే భయం కలిగే విధంగా ప్రభుత్వం వ్యవహరిస్తోందని , సేద్యం చేసే కన్నా ఉపాధి హామీ జామ్ కార్డు మేలు అని రైతులు భావిస్తున్నారని తెలిపారు. కరవు బాధితులకు 1816 కోట్ల రూపాయల ఇన్‌పుట్ సబ్సిడీ ఇస్తామని చెప్పి ఇప్పటి వరకు కేవలం 450 కోట్ల రూపాయలు మాత్రమే చెల్లించారని తెలిపారు. వైఎస్ హయాంలో రైతులకు జరిగిన అన్యాయం రాష్ట్రంలో మరెప్పుడూ జరగలేదన్నారు. సెజ్‌ల పేరుతో లక్షలాది ఎకరాల భూములను రైతుల నుండి బలవంతంగా స్వాధీనం చేసుకున్నారని విమర్శించారు. లక్షలమంది రైతులు నిరాశ్రయులు కాగా, డజన్ల మంది పారిశ్రామికవేత్తలను వేల కోట్లకు అధిపతులను చేశారని విమర్శించారు. రైతు రుణాలు మాఫీ చేద్దామని కేంద్రం ప్రతిపాదిస్తే అప్పులు ఎగవేసే వారు పెరుగుతారని వైఎస్‌ఆర్ అన్నారని తెలిపారు.