Posted: 04/27/2012 03:45 PM IST

మాస్టర్‌ బ్లాస్టర్‌ సచిన్‌ రమేశ్‌ టెండూల్కర్‌ మరో అరుదైన మైలురాయిని అందుకున్నాడు. భారత పార్లమెంట్‌ చరిత్రలో రాజ్యసభకు ఎంపికైన తొలి క్రికెటర్‌ ఘనతను సచిన్‌ దక్కించుకున్నాడు. రాజ్యసభకు నామినేట్‌ చేసిన 12 మంది సభ్యుల్లో సచిన్‌ కూడా ఉన్నాడు. సచిన్‌ రాజ్యసభ అభ్యర్థిత్వాన్ని రాష్ట్రపతి గురువారం ఆమోద ముద్ర వేశారు. ఇప్పుడు ఆసక్తిగా వినిపిస్తున్న మాట ఏంటంటే క్రికెట్‌లో వంద సెంచరీలు చేసి చరిత్ర సృష్టించిన సచిన్ రాజ్యసభలోనూ వందో నంబర్ ఉన్న సీటును పొందుతాడా అనే సందేహం రాజకీయవేత్తగా మారిన ప్రముఖ క్విజ్ మాస్టర్ డెరెక్ ఒబ్రియన్‌కు వచ్చింది.

 ‘ప్రస్తుతం వందో సీట్లో ఉన్న ప్రముఖ వాణిజ్యవేత్త అశోక్ గంగూలీ... సచిన్ కోసం తన స్థానాన్ని ఖాళీ చేసేందుకు సిద్ధంగా ఉన్నారు. ఈ విషయం గంగూలీ నాతో చెప్పారు. అయితే మాస్టర్‌కు దగ్గర్లో సీటు ఇవ్వాలని షరతు పెట్టారు’ అని ఒబ్రియన్ ట్విట్టర్‌లో పేర్కొన్నారు. అయితే సచిన్ ఎంపిక పట్ల బీసీసీఐతో పాటు, మాజీలు, అన్ని రాజకీయ పార్టీలు హర్షం వ్యక్తం చేశాయి. మరి సెంచరీల వీరుడికి 100 నెంబర్ సీటు దక్కుతుందో లేదో చూడాలి.