Posted: 03/10/2012 06:06 PM IST

మీరు 'అవతార్' సినిమా చూశారా? అందులో.. మనుషులు ఒక చోట వారి 'అవతార్లు' మరొక చోట ఉంటాయి! శారీరకంగా ఒక చోట ఉంటూనే.. బుర్రతో రెండోచోట పని నడిపించేస్తూ ఉంటాడు హీరో. అచ్చం అలాంటి కాన్సెప్టునే వైద్య చికిత్సలోనూ ప్రయోగిస్తే? రోగులకు వైద్యం చేసే ముందు వారి అవతార్లకు వైద్యం చేసి, మందుల వల్ల ఎలాంటి దుష్ప్రభావాలు కలుగుతాయో తెలుసుకుంటే? ..ఇలా రకరకాల ఆలోచనలు బ్రిటన్ వైద్యులకు ఇటీవలే వచ్చాయి.

వచ్చిందే తడవుగా ఈ ప్రాజెక్టు సాధ్యాసాధ్యాలపై పరిశోధన మొదలుపెట్టేశారు. వారు చెబుతున్నదాని ప్రకారం.. రోగులు తమ దగ్గరకు ఏదైనా అనారోగ్యంతో వచ్చినప్పుడు గూగుల్ ఎర్త్ తరహాలో వారి శరీరాన్ని త్రీడీ పద్ధతిలో పూర్తిస్థాయిలో స్కాన్ చేస్తారు. దాని ఆధారంగా ఆ రోగి త్రీడీ నమూనాను తయారుచేస్తారు. కంప్యూటర్ ఆధారంగా అన్ని రోగలక్షణాలనూ ఆ త్రీడీ అవతార్‌కు ఆపాదిస్తారు. ఆనక దానిపై ప్రయోగాలు చేయడం మొదలుపెడతారు.

రకరకాల ట్రీట్‌మెంట్లు ఇచ్చి చూసి.. దుష్ప్రభావాలు కలగజేసేవాటిని వదిలేసి, బాగా నయం చేసేవాటిని పేషెంటుకు సిఫారసు చేస్తారు. మరో ఇరవై సంవత్సరాల్లో ఈ టెక్నాలజీ అందుబాటులోకి వస్తుందని ఇన్‌స్టిట్యూట్ ఆఫ్ బయోమెడికల్ ఇమేజింగ్ అండ్ మోడలింగ్ చెబుతోంది.