Posted: 01/31/2012 12:34 PM IST

నిన్న రథ సప్తమి సందర్భంగా సూర్య భగవానుడు మానవాళికి బహూకరించే మరో వరం వెలుగులోకి వచ్చింది. అంధకారం పోగొట్టటం, గతిని కాలాన్ని నియంత్రించటం, బాక్టీరియాల నుంచి కాపాడటం, చర్మ వ్యాధులనుండి రక్షించటమే కాకుండా సూర్యకాంతి సంతాన ప్రదాతని కూడా నిరూపించబడింది. ప్రత్యక్ష భగవానుడిగా కొలిచే సూర్యకాంతి వలన విటమిన్ డి లభిస్తుంది. అందువలన తీక్షణంగా ఉండే ఎండ కాకుండా నిర్మలమైన సూర్యకాంతిలో గడిపినట్లయితే పురుషులలోనూ స్త్రీలలోనూ కూడా సంతానోత్పత్తిని కలిగించే హార్మోన్లు వృద్ధిచెందుతాయని యూరోపియన్ జర్నల్ ఆఫ్ ఎండోకైనాలజీవారు తమ పరిశోధనలో లభించిన ఫలితాలను వెల్లడిచేసారు.

సూర్యరశ్మిలో ఉదయాన ప్రసరించే కిరణాలకే ప్రాణికోటికి ఉపయోగపడే లక్షణాలున్నాయని శాస్త్రవేత్తలు కూడా ఒప్పుకుంటారు. వ్యవసాయంలో కూడా బారులుగా చెట్లను నాటినప్పుడు ఉదయకాంతికే ఎక్కవ ప్రాధాన్యతనిస్తారు. అందుకే సంధ్యవార్చటమనే సాంప్రదాయాన్ని కూడా తీసుకునివచ్చారు. ఉషకాలంలో సూర్యుడికి ఆర్ఘ్యం ఇవ్వటానికి అదే కారణం. ఆచారంగా ప్రవేశపెట్టి మానవులకు ఉపయోగపడే విధంగా రూపకల్పన చేసినవి ఇప్పుడు మళ్ళీ ఒక్కొక్కటే శాస్త్రవేత్తల పరిశోధనల్లో బయటకు వస్తున్నాయి.

ఖరీదైన వైద్యం చేయించుకునేబదులు దంపతులు సూర్యరశ్మిలో గడిపితే మంచిదని, సహజరీతిలో హార్మోన్ల వృధ్ది జరిగి సంతాన సాఫల్యానికి దోహదం చేస్తుందని శాస్త్రవేత్తలు సూచిస్తున్నారు.

-శ్రీజ