Posted: 12/10/2011 11:08 AM IST

కొంతకాలంగా క్యాన్సర్‌తో బాధపడుతున్న సీనియర్ ఛాయా గ్రాహకుడు పి.ఎస్.లోక్‌నాథ్ (70) శుక్రవారం చెన్నైలో మృతి చెందారు సూపర్‌స్టార్ రజనీకాంత్‌ను తొలిసారిగా కెమెరాలో బంధించింది ఈయనే. లోక్‌నాథ్ పలు భాషల్లో దాదాపు 80 చిత్రాలకు పని చేశారు. ఇందులో 50 చిత్రాలు కె.బాలచందర్ దర్శకత్వం వహించినవే కావడం విశేషం. మూండ్రు ముడిచ్చు, అపూర్వ రాగంగళ్, అరంగేట్రం, అవల్ ఒరు తొడర్ కథై, అగ్నిసాక్షి, అచ్చమిలై  అచ్చమిలై , మరో చరిత్ర (తెలుగు) వంటి ఎన్నో గొప్ప చిత్రాలకు లోక్‌నాథ్ ఛాయాగ్రహణం నెరపారు.

లోక్‌నాథ్‌కు భార్య, ఇద్దరు కుమారులు, ఇద్దరు కుమార్తెలు. చిన్న కుమారుడు ఇటీవల కన్నుమూశారు. కేకేనగర్ ఐదవ సెక్టార్‌లో ఉన్న నివాసంలో లోక్‌నాథ్ భౌతికకాయాన్ని ఉంచారు. లోక్‌నాథ్ మరణంతో తానొక గురువును కోల్పోయానని, ఆయనతో తనకు 35 చిత్రాల అనుబంధం ఉందని కమల్‌హాసన్ అన్నారు. దర్శకుడు కె.బాలచందర్, దర్శక ఛాయాగ్రాహకుడు ఎన్‌కె.విశ్వనాథన్, పన్నీర్ సెల్వం, రవీంద్రన్, పీసీ శ్రీరామ్ తదితరులు లోకనాథ్‌కు నివాళులర్పించారు.