Posted: 03/01/2013 05:52 PM IST

వస్తున్నా...మీకోసంలో టీడీపీ అధినేత చంద్రబాబుకు పలువురు మహిళలు తమ సమస్యలను ఏకరువుపెట్టారు. దాంతో ఆయన అధికారంలోకి వస్తే అందరి సమ్యలు తీరుస్తానంటూ భరోసా ఇచ్చారు. జిల్లాలోకి పాదయాత్ర ప్రవేశించగానే కార్యకర్తలు ఘనస్వాగతం పలికారు. పులిగడ్డ-పెనుమూడి వారధి మీదుగా చేరుకోగా, ఇరువైపులా బారులుతీరిన మహిళలు బాబును కలిసి సమస్యలు విన్నవించారు. బాబు ప్రజల సమస్యలను ఆలకించి వారికి భరోసానిచ్చే ప్రయత్నం చేశారు. గ్యాస్ ధరలు పెరగడంతో తీవ్ర ఇక్కట్లు పడుతున్నామనీ, మద్యపానాన్ని నిషేధించాలనీ, డ్వాకా గ్రూపుల నుంచి అధిక వడ్డీలు వసూలు చేస్తున్నారనీ, సబ్సిడీ నగదు బదిలీ వద్దని...నగదు బదిలీ అమలుచేస్తే మా మగవాళ్ళు తాగితందనాలు ఆడతారుతప్పితే ఉపయోగం ఉండదంటూ పలువురు మహిళలు విన్నవించారు. విద్యార్ధినిలను చూసి ఆగిన బాబు వారికి కరచాలనం చేసి కుశల ప్రశ్నలు వేశారు. బాగా చదువుతున్నారా.. అంటూ ముందుకు సాగారు. దివిసీమ పాలిటెక్నిక్ విద్యార్థులు చంద్రబాబునుకలిసి స్కాలర్‌షిప్ సమస్యలు తెలిపారు. ఓసీలకు స్కాలర్‌షిప్‌లు అందడంలేదని తెలిపారు. ఫీజు రీయింబర్స్‌మెంట్ సైతం సరిగా రావటంలేదన్నారు. అవనిగడ్డ-రేపల్లె బస్సు సర్వీసు లేకపోవటంతో ఇబ్బందులు పడుతున్నామని వాపోయారు. గుంటూరు నాంచారయ్య నేతృత్వంలో పలువురు ఎస్సీ వర్గీకరణ వద్దనీ, సమైక్యమే ముద్దని నినాదాలు చేయగా, ఎమ్మార్పీఎస్ శ్రేణులు, టీడీపీ కార్యకర్తల రాకను చూసి పోలీసులు వారిని పంపించివేశారు.

మత్య్సకారులకు ప్ర జాప్రతినిధులుగా తగినంత గుర్తింపు రావటంలేదనీ, ప్రాతినిధ్యం కల్పించాలని లకనం నాగాంజనేయులు వినతిపత్రం అందజేశారు. అవనిగడ్డ సీబీఎం బోర్డింగ్‌స్కూల్ ఆక్రమణకు గురైందంటూ పాస్టర్ దేవదానం, డి.మోజెస్, డి.కాంతారావు వినతిపత్రం అందజేశారు. ముస్లిం మైనారిటీ రిజర్వేషన్ పోరాటసమితి నేతలు పఠాన్ కరీముల్లాఖాన్, షేక్ నబీఘోరి ముస్లింల సమస్యల పరిష్కారించాలంటూ వినతిపత్రాలు అందజేశారు. మహిళల ఇబ్బందులను సావధానంగా ఆలకించిన చంద్రబాబు అన్నీ సమస్యలే...టీడీపీ అధికారంలోకి వస్తే పరిష్కారం అవుతాయన్నారు. ధరలు, విద్యుత్‌ఛార్జీల పెంపు, గ్యాస్‌ధరలు, మద్యపాన నిషేదం ఇలా ప్రతి అంశాన్ని చంద్రబాబు ఆలకించారు.