Posted: 02/25/2013 03:40 PM IST

విజయవాడ భవానీపురం ఐరన్‌యార్డులో సుమారు 250 నుంచి 300 వరకూ ఐరన్ దుకాణాలుంటాయి. నిత్యం కొట్లాది రూపాయల వ్యాపార లావాదేవీలు జరుగుతుంటాయి. సుదూర ప్రాంతాల నుంచి ఇక్కడికి వచ్చి ఇనుము కొనుగోలు చేసే వారి సంఖ్య ఎక్కువే. ఇక్కడి ఐరన్ దుకాణాల్లో వ్యాపారమంతా అక్కడి గుమస్తాల కనుసన్నల్లో జరుగుతుంటుంది. కొన్నాళ్ళుగా ఇక్కడి దుకాణాల్లో పెద్ద మొత్తంలో ఐరన్ చువ్వలు, ఇతర ఐరన్ వస్తువులు పక్కదోవ పడుతున్నాయి. దీనిపై చాలా కాలంగా మల్లగుల్లాలు పడుతున్న వ్యాపారులు సుమారు 15 రోజుల క్రితం స్థానిక వన్‌టౌన్ పోలీస్ స్ఠేషన్‌లో ఐదుగురు ఫిర్యాదు చేశారు.  సుమారు 500 టన్నుల ఐరన్ కనిపించకుండా పోయిందని ఓ వాదన. అయితే వ్యాపారులు మాత్రం సుమారు 50 నుంచి 60 టన్నులు చోరీకి గురయిందని ఫిర్యాదులో పేర్కొన్నారు. దీనిపై పోలీసులు 18 మంది అనుమానితులను అదుపులో తీసుకున్నారు. వీరిలో దుకాణాలకు చెందిన కొందరు గుమస్తాలు, అటోడ్రైవర్లు, జట్టు ముఠా కార్మికులు ఉన్నట్లు సమాచారం. ఈ దుకాణాల్లో ముఖ్యం గా రాత్రి సమయాల్లో ఎలాంటి రక్షణ లేకుండా ఉన్న ఐరన్ చువ్వలను ఈ అనుమానితులు మూడో కంటికి తెలియకుండా వేరే ప్రాంతానికి చేరవేయడంతో పాటు మరి కొన్ని సందర్భాల్లో తమ యజమానులకు తెలియకుండానే వారిలో వారు కొనుగోలు అమ్మకాలు జరుపుతుంటారని విశ్వసనీయ సమాచారం. ఇలా చోరీకి గురైన ఇనుప చువ్వలను కొనుగోలు చేసిన సాధారణ వ్యక్తులు కొందరిని కూడా పోలీసులు అనుమానితులుగా గుర్తించి వారిని స్టేషన్‌కు తీసుకు వచ్చారు.