Posted: 02/25/2013 03:26 PM IST

కార్పొరేషన్‌ను నమ్ముకుని పనులు చేపట్టి, అప్పులపాలైన చిన్న కాంట్రాక్టర్లు నిన్నటి వరకు గొంతెత్తారు. దీనికే కార్పొరేషన్ పరువు నడి బజారులో కలిసింది. చిన్న కాంట్రాక్టర్ల నిరసనలతో రాష్ట్ర ప్రభుత్వం దిగి వచ్చినట్టు నటించినా, నిధులు మాత్రం విదిల్చలేదు. ప్రజా ప్రతినిధులు కూడా ప్రేక్షకపాత్ర పోషిస్తున్నారు. ఇప్పుడు పరిస్థితి మరింత జఠిలం అయింది. ఇప్పటి వరకు కొన్ని సందర్భాలలో మాత్రమే నోరు తెరిచిన కార్పొరేషన్ బడా కాంట్రాక్టర్లు ఇప్పుడు బిల్లులు చెల్లిస్తారా? లేదా? అంటూ అల్టిమేటం జారీ చేస్తున్నారు. ఇంజనీరింగ్ అధికారులపై పక్షం రోజులుగా లేఖాస్త్రాలు సంధిస్తూ ఒత్తిళ్ళు తెస్తున్నారు. ఈ పరిణామం కార్పొరేషన్‌ను మరింత ఇరుకున పెడుతోంది. జేఎన్ఎన్‌యూఆర్ఎం పనులు చేపట్టిన బడా కాంట్రాక్టర్లలో ఎక్కువ మంది హౌసింగ్ కాం ట్రాక్టర్లే ఇప్పుడు ఒత్తిడి తెస్తున్నారు. గతంలో ఒక్కసారి హౌసింగ్ కాంట్రాక్టర్లు తమ బకాయిల విషయంలో జేఎన్ఎన్‌యూఆర్ఎం ఇళ్ళకు తాళాలు వేశారు. ఈ విషయాన్ని అప్పట్లో 'ఆంధ్రజ్యోతి' వెలుగులోకి తెచ్చింది. ఆ తర్వాత హడ్కో నుంచి తీసుకున్న అప్పు, తర్వాత క్రమంలో విడుదలైన గ్రాంటు నుంచి కొంత సర్దుబాటు చేయటంతో పరిస్థితి అదుపులోకి వచ్చింది.  

దీర్ఘకాలం బిల్లులు చెల్లించకపోవటంతో కార్పొరేషన్ అధికారులపై క్రమేణా బడా కాంట్రాక్టర్లు ఒత్తిడి తెస్తున్నారు. ప్రస్తుతం హౌసింగ్ కాంట్రాక్టర్లకు చెల్లించాల్సిన బకాయే రూ.62.52 కోట్లు ఉంది. కొద్ది రోజుల క్రితం కార్పొరేషన్ అధికారులు ప్రభుత్వం నుంచి నిధులు పొందటానికి జేఎన్ఎన్‌యూఆర్ఎం మిగులు పనులకు సంబంధించిన యాక్షన్ ప్లాన్స్‌ను రూపొందించారు. అయినప్పటికీ ప్రభుత్వం కనికరించలేదు. ప్రజాప్రతినిధులు సైతం ప్రభుత్వంపై ఒత్తిడి తీసుకురావడం లేదు. దీనితో బడా కాంట్రాక్టర్లు ఒత్తిడి పెంచుతున్నారు. ఒకవేళ తమకు బిల్లులు చెల్లించలేని పక్షంలో, సీరియస్‌గానే వ్యవహరించాలని వారు ఆలోచన చేస్తున్నట్టు తెలుస్తోంది. ఇదే జరిగితే పరిస్థితిని కార్పొరేషన్ ఎలా చక్కదిద్దగలుగుతుందన్నదే ప్రశ్నగా ఉంది.